Latestமலேசியா

இந்தியர்களின் பிரச்சனையைத் தீர்க்க புதிய பட்ஜெட் தவறிவிட்டது – எதிர்க்கட்சி எம்.பிக்கள் அறிக்கை

கோலாலம்பூர். நவ 12 – இந்தியர்கள் எதிர்நோக்கும் பல்வேறு பிரச்சனைகளுக்கு தீர்வு காண்பதில் புதிய பட்ஜெட் தவறிவிட்டது என எதிர்க்கட்சியான பக்காத்தான் ஹரப்பான் கூட்டணியைச் சேர்ந்த பி.கே.ஆர் மற்றும் ஜ.செ.க நாடாளுமன்ற உறுப்பினர்கள் வெளியிட்ட கூட்டறிக்கையில் தெரிவித்துள்ளனர்.

அண்மையில் நிதி அமைச்சர் சமர்ப்பித்த 2021 ஆம் ஆண்டுக்கான வரவு செலவு திட்டம் வசதிக் குறைந்த B 40 மக்களுக்கு உதவக்கூடிய பெரிய அம்சங்களை கொண்டிருக்கவில்லை. அதோடு தமிழ்ப்பள்ளிக்காக சிறப்பு ஒதுக்கீடு எதுவும் வழங்கப்படாதது பெரும் ஏமாற்றத்தை ஏற்படுத்தியிருப்பதாக டாக்டர் சேவியர் ஜெயக்குமார், வி.சிவகுமார், சிவராசா ராசையா,சார்லஸ் சன்டியாகோ, கருப்பையா முத்துசாமி , எஸ். கேசவன், பி. பிரபாகரன், ஆகிய எம்.பிக்கள் வெளியிட்ட அறிக்கையில் சுட்டிக்காட்டினர்.

இதற்கு முன் ஆண்டுதோறும் , தமிழ்ப்பள்ளிகளுக்கென, 5கோடி ரிங்கிட் நிதி ஒதுக்கப்பட்டு வந்தது. ஆனால் அடுத்த ஆண்டுக்கான வரவு செலவுத் திட்டத்தில் தமிழப்பள்ளிகளுக்கான ஒதுக்கீடு முற்றாக அகற்றப்பட்டுள்ளது இந்திய சமுகத்தில் பெரும் அதிருப்தியை ஏற்படுத்தியுள்ளது. . இது குறித்து நிதி அமைச்சர் விளக்கம் அளிக்க வேண்டும் என்பதோடு தமிழ் பள்ளிக்கு சிறப்பு ஒதுக்கீட்டை அறிவிக்க வேண்டும்..

மேலும் வசதிக் குறைந்த இந்தியக் குடும்பத்தை சேர்ந்தவர்கள் தங்களது பிள்ளைகள் இணையத்தின் மூலம் கல்வியை தொடர்வதில் இணைய அணுகல் இல்லாமை மற்றும் மடிக்கணினி போன்ற வசதிகள் இல்லாமல் சிரமத்தை எதிர்நோக்குகின்றனர். பி40 குடும்பங்களுக்குத் தலா ஒரு மடிக்கணினி மற்றும் இலவச இணைய அணுகல் திட்டத்தை அரசாங்கம் வழங்க வேண்டும்.
. இந்திய வணிகங்களுக்குக் கடன் ஒத்திவைப்பு (loan moratorium) மற்றும் மானியங்களை வழங்கி அரசாங்கம் உதவ வேண்டும். கடன்களுக்கான விண்ணப்பச் செயல்முறை, சிறு வணிகங்களுக்கு எளிதாகவும் வசதியாகவும் இருக்க வேண்டும்.

இந்தியச் சமூகத்தை, கோவிட்-19 பொருளாதாரத் தாக்கத்திலிருந்து மீளச்செய்ய, RM 100 மில்லியன் ஒதுக்கீட்டைப் பயன்படுத்த மித்ராவுக்கு ஓர் ஆக்கபூர்வமான அணுகுமுறை தேவை.அரசாங்கத்தின் உதவித் திட்டங்கள் வேறுபாடின்றி, பாதிக்கப்படக்கூடிய அனைத்து பி40 குடும்பங்களாலும் எளிதில் அணுகக்கூடியதாக இருக்க வேண்டும்.சமூகநலத்துறை (ஜே.கே.எம்.), உள்நாட்டு வருவாய் வாரியம் (எல்.எச்.டி.என்.) (வாழ்வாதார உதவிதொகை – பி.எஸ்.எச். விண்ணப்பம்), தெக்குன், சொக்சோ மற்றும் இ.பி.எஃப். அலுவலகங்களில், பல்லினங்களின் அதிகாரிகளை முன்னணியில் நியமிக்குமாறு அரசாங்கத்தை நாங்கள் கேட்டுக்கொள்கிறோம். அதோடு வசதிக் குறைந்த இந்திய ஏழை மக்களுக்கு கோவிட் தொற்று தாக்கத்திலிருந்து உதவுவதற்கு அவசர உதவியும் வழங்கப்பட வேண்டும் என எதிர்க்கட்சி நாடளுமன்ற உறுப்பினர்கள் வெளியிட்ட அறிக்கையில் வலியுறுத்தினர்.

Show More

Related Articles

Back to top button
error: Content is protected !!