Latestமலேசியா

இந்திரா காந்தியின் வழக்கு மனுவை தள்ளுபடி செய்வதற்கு போலீஸ்- அரசு தரப்பு முயற்சி

கோலாலம்பூர், ஜன 14 – தமது மகளை கண்டுப் பிடித்து ஒப்படைக்கத் தவறிய முன்னாள் கணவர் முகமட் ரிடுவான் அப்துல்லாவை கைது செய்யத் தவறியதற்காக தங்களுக்கு எதிராக இந்திரா காந்தி தொடுத்திருக்கும் வழக்கு மனுவை தள்ளுபடி செய்வதற்கான முயற்சியில் அரசாங்கம் மற்றும் போலீஸ் ஈடுபட்டு வருகிறது.

உயர் நீதிமன்ற துணை பதிவதிகாரி முன்னிலையில் இந்த வழக்கு தொடர்பான ஆவணங்களை ஒப்படைக்கும் நடவடிக்கைக்கு பின் செய்தியாளர்களிடம் பேசியபோது இந்திரா காந்தியின் வழக்கறிஞர் ராஜேஸ் நாகராஜன் இதனை தெரிவித்தார். இந்திரா காந்தியின் வழக்கு மனுவை தள்ளுபடி செய்வதற்கான மனுவை தாங்கள் தாக்கல் செய்துள்ளதாகவும் வாதியிடம் இன்று இந்த விண்ணப்பம் சமர்ப்பிக்கப்பட்டதாக பிரதிவாதிகளின் சார்பில் ஆஜரான சட்டத்துறை தலைவர் அலுவலகத்தின் வழக்கறிஞர் தெரிவித்ததாக ராஜேஸ் நாகராஜன் கூறினார்.

வழக்கை தள்ளுபடி செய்யவிருப்பதற்கான எழுத்துப் பூர்வமான மனுவுக்கு ஜனவரி 29ஆம் தேதிக்குள் போலீசிற்கு பதில் அளிக்கும்படியும் அரசாங்கத்திற்கு பிப்ரவரி 15ஆம் தேதிக்குள் பதில் அளிக்கும்படியும் இந்திரா காந்திக்கு நீதிமன்றம் பணித்துள்ளதாகவும் ராஜேஸ் தெரிவித்தார்.  இந்திரா காந்தியின் மனுவை தள்ளுபடி செய்வதற்கு போலீஸ் மற்றும் அரசாங்கம் செய்துள்ள விண்ணப்பத்திற்கு பொருத்தமான காரணம் எதனையும் தெரிவிக்கவில்லை.

அந்த வழக்கு மனு முக்கியத்துவம் இல்லாமல் இருப்பதோடு நீதிமன்ற நடைமுறைக்கு மீறிய ஒன்றாக இருப்பதாக அவர்கள் அந்த மனுவில் கூறியுள்ளனர். இதனிடையே ரிடுவான் எங்கே இருக்கிறார் என்பது குறித்து போலீஸ் படை தலைவரிடமிருந்து மேல் விவரங்களை பெறுவதற்காக இந்திரா காந்தி சமர்ப்பித்துள்ள மனுவுக்கு பிப்ரவரி 4 ஆம் தேதிக்குள் பதில் வழங்கும்படி அரசாங்கத்திற்கு நீதிமன்றம் பணித்துள்ளதாகவும் ராஜேஸ் தெரிவித்தார்.

Show More

Related Articles

Back to top button
error: Content is protected !!