போர்ட் கிள்ளான், நவம்பர்-29 – MBDK எனப்படும் கிள்ளான் அரச மாநகர் மன்றம், ஊடகங்களை கௌரவிக்கும் வகையில் அண்மையில் விருந்துடன் கூடிய விருது விழாவை நடத்தியது.
மாநகரை செழிப்பாக்கும் முயற்சியில் MBDK எடுத்து வரும் முன்னெடுப்புகளுக்கு ஊடகங்கள் வழங்கி வரும் ஆதரவை அங்கீகரிப்பதே இதன் நோக்கமாகும்.
போர்ட் கிள்ளான், Royal Selangor Yatch Club-பில் ‘ஹவாய் இரவு’ எனும் வண்ணமயமான கருப்பொருளில் நிகழ்ச்சி நடைபெற்றது.
கிள்ளான் மேயர் டத்தோ அப்துல் ஹமிட் ஹுசாய்ன் விழாவுக்குத் தலைமைத் தாங்கி அதிகாரப்பூர்வமாக தொடக்கி வைத்தார்.
அவர் தமதுரையில்,
குப்பை வீச்சு, தெருநாய்கள், போக்குவரத்து நெரிசல் போன்ற உள்ளூர் பிரச்னைகளை ஊடகங்கள் வெளிக்கொணரும் போது, அது MBDK-க்கு விரைவாகச் செயல்பட உதவும் என்றார்.
கிள்ளான் ஆற்றை சுத்தப்படுத்தும் திட்டத்தில் 1,234 கிலோ குப்பை அகற்றப்பட்ட தகவலும், தெங்கு கிளானா சாலையில் தீபாவளி அலங்கார வாயில் திறக்கப்பட்ட தகவலும் ஊடகங்களின் நேர்மையான செய்திகளால் மக்களிடம் அதிக விழிப்புணர்வை ஏற்படுத்தியதாகவும் அவர் பாராட்டினார்.
MBDK மாநகர் மன்ற உறுப்பினர்களும் துறைத் தலைவர்களும் வந்திருந்தனர்.
பெர்னாமா, RTM, TV3, அஸ்ட்ரோ அவானி, வணக்கம் மலேசியா உள்ளிட்ட 15-க்கும் மேற்பட்ட ஊடக நிறுவனங்களின் ஆசிரியர்கள், செய்தியாளர்கள், புகைப்படக் கலைஞர்கள் வழாவில் கலந்து கொண்டனர்.
வணக்கம் மலேசியா சார்பில் அதன் நிர்வாக இயக்குநர் எம். தியாகராஜன் பங்கேற்றார்.
நிகழ்ச்சியின் முக்கிய அம்சமாக MBDK ஊடக விருதுகள் வழங்கப்பட்டன.
அதில் வணக்கம் மலேசியாவுக்கு ‘சிறந்த மின்னியல் ஊடகச் செய்தி’ விருது வழங்கப்பட்டது.
வணக்கம் மலேசியாவின் செய்திப் பிரிவுத் தலைவர் வேதகுமாரி விருதினைப் பெற்றுக் கொண்டார்.
கிள்ளான் மண்ணின் மைந்தர்களான புகழ்பெற்ற கலைஞர்களின் இசைப் படைப்புகளோடு, அதிர்ஷ்டக் குலுக்கு போன்ற நிகழ்வுகளும் விழாவை மேலும் சிறப்பித்தன.
MBDK, ஊடகங்களின் தொடர்ந்த ஆதரவுக்கு நன்றி தெரிவித்து, “ஊடகங்களுடன் இணைந்து கிள்ளான் செழிக்கட்டும்” என்ற செய்தியை வலியுறுத்தியது.
