செப்பாங், நவம்பர்-29 – KLIA-வில் போலீஸாரிடம் உதவி கேட்ட ஆடவரின் செயல் இணையத்தில் வைரலாகி வருகிறது.
காரணம்…அவர் உதவி கேட்டது ஏதோ ஆபத்து அவசரத்திற்காக அல்ல – மாறாக, தனது கைப்பேசி பேட்டரி தீர்ந்துபோனதால்…
அந்த ஆடவர் தனது காரை போலீஸ் வாகனத்தின் பின்னால் நிறுத்த, ஒரு போலீஸ்காரர் வந்து காரணம் கேட்பதும், உடனே அவர் “போலீஸ் காரில் கைப்பேசி charge இருக்கிறதா?” எனக் கேட்பதும் போலீஸ் ரோந்து காரின் dashcam கேமராவில் பதிவான வீடியோவில் தெரிகிறது.
தான் சுமார் 30 நிமிடங்கள் விமான நிலையத்தில் சுற்றி, அங்கு வேலை செய்யும் தனது காதலியைத் தேடிக் கொண்டிருந்ததாகவும், ஆனால் கைப்பேசி பேட்டரி தீர்ந்து விட்டதால் தொடர்பு கொள்ள முடியவில்லை என்றும் அவர் கூறினார்.
போலீஸாரும் சிரித்துக் கொண்டே, அவருக்கு 10 நிமிடங்கள் வரை charge செய்ய அனுமதி அளித்தனர்.
இந்த வீடியோ சமூக வலைத்தளங்களில் வைரலாகி, பலர் நகைச்சுவையாக கருத்து தெரிவித்துள்ளனர்.
“போலீஸை விட காதலி திட்டுவார் என்ற பயமே அவ்வாடவருக்கு அதிகம் போல” என்று வலைத்தளவாசிகள் கிண்டலிடிக்கின்றனர்.
அந்த வீடியோ PDRM ஃபேஸ்புக் பக்கத்திலேயே பதிவேற்றம் செய்யப்பட்டுள்ளது.
