பேராக், நவம்பர் 26 – கடந்த நவம்பர் 22 ஆம் தேதியன்று பேராக் மாநில தீயணைப்பு துறையின் இந்திய அதிகாரிகளின் ஏற்பாட்டில் 29 வது தீபாவளி கொண்டாட்டம் மிக சிறப்பாக நடந்தேறியது.
நாட்டிலுள்ள அனைத்து தீயணைப்பு நிலையங்களிலிருந்தும் சுமார் 79 இந்திய தீயணைப்பு வீரர்கள் உட்பட அருகாமையிலுள்ள Kastam, Imigresen, JKR, JPN, மற்றும் ஈப்போ ஊராட்சி மன்றம் என சுமார் 250 பேர் இவ்விழாவில் கலந்து சிறப்பித்தனர்.
சிலம்பம், பரதம் போன்ற தமிழ் பண்பாட்டு அம்சங்களை உள்ளடக்கிய இந்த தீபாவளி கொண்டாட்டத்தில் ‘Malim Mawar’-இன் சட்டமன்ற உறுப்பினர் YB.பவானி, பேராக் மாநில சட்டமன்ற உறுப்பினர் YB. சிவநேசனின் பிரதிநிதி, பேராக் மாநில தீயணைப்புத்துறையின் துணை இயக்குனர் Yusri bin Mohd Yusiff ஆகியோர்கள் சிறப்பு விருந்தினர்களாக கலந்து கொண்டனர்.
இந்நிலையில் நிகழ்வில் உரையாற்றிய YB. பவானி, தீயணைப்பு வீரர்களின் சேவை மற்றும் சமுதாய ஒற்றுமையை பாராட்டி, புதிய சேர்க்கை திட்டங்கள் அவசியம் என்று வலியுறுத்தினார். தகுதியுள்ள இளைஞர்கள் தீயணைப்பு துறையில் இணைய வேண்டுமென்று கூறிய அவர் தனது தீபாவளி வாழ்த்துகளையும் தெரிவித்துக்கொண்டார்.
மேலும் இந்திய சமூக உறுப்பினர்களுக்கான பயிற்சிகள், தமிழ் பள்ளிகளில் தீயணைப்பு பயிற்சிகள் மற்றும் சமூக விழிப்புணர்வு திட்டங்களைப் பற்றி உரையாற்றிய பேராக் மாநில தீயணைப்புத்துறையின் உதவி இயக்குனர் யூஸ்ரி பின் முகமட் யூசிப் ஹாஷிம், தனது தீபாவளி வாழ்த்துக்களை இவ்வேளையில் பகிர்ந்து கொண்டார்.
மலேசியாவில் தீயணைப்புத்துறையில் இந்தியர்களின் எண்ணிக்கை தொடர்ந்து குறைந்து வருவதை பொதுமக்களின் பார்வைக்கு கொண்டு வரும் ஒரு தலமாகவும் இவ்விழா அமைந்துள்ளது. அதே நேரத்தில் பேராக் மாநில இந்திய தீயணைப்பு வீரர்களின் இதர நடவடிக்கைகள் குறிப்பாக தமிழ் பள்ளிகளுக்கு சொற்பொழிவாற்றுதல் போன்ற அனைத்தும் இந்நிகழ்வில் பகிரப்பட்டது.
இந்த தீபாவளி நிகழ்விற்கு பண உதவி அளித்து பேராதரவு வழங்கிய YB டத்தோ சிவநேசனுக்கு, தங்களது உளமார்ந்த நன்றியைத் தெரிவித்துக் கொண்ட பேராக் தீயணைப்புத்துறை உடல் நலம் குன்றிய தமிழ்ப்பள்ளி மாணவர் ஒருவருக்கும் தங்களின் உதவியை வழங்கியது.
