ஹரியானா இந்தியா, நவம்பர் 27 – கடந்த செவ்வாய்க்கிழமை காலை, இந்தியா ஹரியானாவில் 16 வயது தேசிய கூடைப்பந்து வீரர் பயிற்சியின்போது ஏற்பட்ட விபத்தில் பரிதாபமாக உயிரிழந்தார்.
கூடைப்பந்தின் வளை கம்பத்தைப் பிடித்து அவர் தொங்க முயன்றபோது, முன்பே நிலை தடுமாறியிருந்த அந்த இரும்புக் கம்பம் திடீரென முறிந்து அவரது மார்பில் விழுந்தது. CCTV காட்சிகளிலும் கம்பம் பலவீனமாக இருந்ததைத் தெளிவாக காண முடிந்தது.
அருகில் இருந்த வீரர்கள் உடனடியாக ஓடி வந்து கம்பத்தை அகற்றினர். இருந்தாலும் அவரது மார்பு பகுதியில் ஏற்பட்ட கடுமையான காயங்களினால் அவ்வீரர் சம்பவ இடத்திலேயே உயிரிழந்தார்.
இந்த சம்பவத்துக்குப் பிறகு, மைதானத்தில் இருந்த உபகரணங்களின் நிலை மற்றும் பாதுகாப்பு நடைமுறைகள் குறித்து அதிகாரிகள் விசாரணையை ஆரம்பித்துள்ளனர். இதற்கு இரண்டு நாட்களுக்கு முன்பும் பஹதுர்கரில் (Bahadurgarh) இதேபோன்ற விபத்தில் 15 வயது சிறுவன் உயிரிழந்திருந்தது குறிப்பிடத்தக்கது.
