கொழும்பு, நவம்பர்-29 – இலங்கையை வாட்டியுள்ள கடும் கனமழை, வெள்ளம் மற்றும் நிலச்சரிவுகள் இதுவரை 50-க்கும் மேற்பட்ட உயிரிழப்புகளை ஏற்படுத்தியுள்ளன.
பலி எண்ணிக்கை குறைந்தது 56-ரை எட்டியுள்ள நிலையில், 21 பேரை இன்னமும் காணவில்லை.
Ditwah புயலின் தாக்கத்தால், சில பகுதிகளில் 300 மில்லி மீட்டர் வரை மழை பதிவாகி, வெள்ளம் கரைபுரண்டு ஓடியது.
குறிப்பாக Badulla, Nuwara Eliya உள்ளிட்ட மலையகப் பகுதிகளில் வீடுகள் தரைமட்டமாகி சாலைகள் முடங்கியுள்ளன.
ஆயிரக்கணக்கானோர் தற்காலிக நிவாரண மையங்களுக்கு மாற்றப்பட்டனர்.
பல இடங்களில் மின்சாரம் துண்டிக்கபட்டுள்ளது.
இருந்தும், மீட்பு பணிகள் துரிதமாக நடைபெற்று வருகின்றன.
மழை தொடரக்கூடும் என்பதால், மேலும் நிலச்சரிவுகள் ஏற்படும் அபாயம் குறித்து அதிகாரிகள் எச்சரிக்கை விடுத்துள்ளனர்.
அபாயமுள்ள பகுதி வாழ் மக்கள் வீடுகளில் இருந்து வெளியேற்றப்பட்டு வருகின்றனர்.
இந்த பேரழிவை கருத்தில் கொண்டு, அண்டை நாடான இந்தியா உடனடி நிவாரணப் பொருட்களை அனுப்பியுள்ளது.
‘Operation Sagar Bandhu’ எனப்படும் மனிதநேய நடவடிக்கையின் கீழ், இதுவரை 6.5 டன் எடையில் உணவு பொருட்கள், அத்தியாவசிய உதவிப் பொருட்கள் உள்ளிட்ட அவசரத் தளவாடங்கள் இலங்கைக்கு அனுப்பப்பட்டன.
“கடல்வழி அண்டைநாடு” என இந்தியா குறிப்பிட்டுள்ள இலங்கைக்கு இந்த பேரிடர் காலத்தில் முழு ஆதரவு வழங்கப்படுமென இந்திய அரசாங்கம் தெரிவித்துள்ளது.
