கோலாலாம்பூர், நவம்பர்-27 – இணையம் மற்றும் சமூக வலைத்தளங்களில் வேகமாக பரவி வரும் தவறான இஸ்லாமிய கருத்துக்கள் குறித்து முஸ்லீம்கள் அதிகம் விழிப்புணர்வுடன் இருக்க வேண்டும் என, மாமன்னர் சுல்தான் இப்ராஹிம் வலியுறுத்தியுள்ளார்.
இதுபோன்ற முறை தவறிய போதனைகள் மக்கள் நம்பிக்கையை சிதைக்கக்கூடிய ஆபத்தான நிகழ்வாக மாறி வருவதால், பார்க்கும் – கேட்கும் எந்த தகவலையும் பரிசீலிக்காமல் நம்ப வேண்டாம் என அவர் அறிவுறுத்தினார்.
முன்னதாக, ஜோகூர் இஸ்லாமிய சமய அதிகாரிகள், மாநிலத்தில் இந்த தவறான போதனைகளின் பரவலைத் தடுக்க மேற்கொள்ளப்படும் நடவடிக்கைகள் குறித்து மாமன்னருக்கு விளக்கமளித்தனர்.
குறிப்பாக, மாநிலத்திற்கு வெளியிருந்து வரும் நபர்கள் இவ்வகை கருத்துக்களை பரப்ப முயற்சிப்பது பற்றியும் அவருக்குத் தெரிவிக்கப்பட்டது.
எனவே, முஸ்லீம்கள் உண்மையான மத அறிவை வளர்த்துக் கொள்ளவும், இமானை (Iman) வலுப்படுத்தவும் மற்றும் சரியான இஸ்லாமிய மதப் பண்புகளைப் பின்பற்றவும் வேண்டுமென சுல்தான் இப்ராஹிம் கேட்டுக்கொண்டார்.
இன்றைய சவாலான தகவல் சூழலில், மதத்தை தவறாகப் பயன்படுத்தும் முயற்சிகள் அதிகரித்துள்ளதால், ஒவ்வொரு முஸ்லீமும் விழிப்புடன் செயல்படுவது முக்கியம் என்றார் அவர்.
