கோலாலம்பூர், நவம்பர் 30-சபா சட்டமன்றத் தேர்தலில் ஏற்பட்டுள்ள படுதோல்வி, DAP கட்சிக்கு வாக்காளர்கள் அடித்துள்ள “எச்சரிக்கை மணி” என கிள்ளான் முன்னாள் நாடாளுமன்ற உறுப்பினர் சார்ல்ஸ் சாந்தியாகோ நினைவூட்டியுள்ளார்.
அதிர்ச்சிகரமான இந்தத் தோல்வி, கட்சியின் வாங்கி வங்கியான சீன சமூகத்தின் விரக்தியை வெளிப்படுத்துவதாக அவர் கூறினார்.
இதே அதிருப்தி தீபகற்ப மலேசியாவிலும் உருவாகி வருவதாக அவர் எச்சரித்தார்.
எனவே இந்த ‘எச்சரிக்கை மணியை’ புரிந்துகொண்டு, மக்கள் வாழ்வாதாரம், விலைவாசி உயர்வு, நல்லாட்சி, பொறுப்புணர்வு, வெளிப்படைத்தன்மை போன்ற அடிப்படை பிரச்னைகளில் DAP கவனம் செலுத்த வேண்டும்.
மாறாக அரசியல் சதுரங்க விளையாட்டுகளை விட்டொழிக்க வேண்டும் என்றார் அவர்.
கட்சி மீது அகங்காரம் என்ற பார்வை வேரூன்றியிருப்பதாகவும், அது “மக்களின் கட்சி” என்ற DAP-யின் அடையாளத்தை மங்கச் செய்துவிட்டதாகவும் சாந்தியாகோ கூறினார்.
சபா தேர்தல் முடிவுகள் உண்மையில் ஒரு தெளிவான செய்தியாகும்.
இதை DAP தீவிரமாகக் கருதி கவனிக்கிறதா என்பதே, இது தற்காலிக பின்னடைவு தானா அல்லது நாடு முழுவதும் வீழ்ச்சிக்கான தொடக்கமா என்பதை தீர்மானிக்கும் என அறிக்கை வாயிலாக சார்ல்ஸ் சாந்தியாகோ நினைவுறுத்தினார்.
நேற்றைய சட்டமன்றத் தேர்தலில் போட்டியிட்ட அனைத்து 8 தொகுதிகளிலும் DAP தோல்வியுற்றது.
இதையடுத்து 2004-ங்காம் ஆண்டுக்குப் பிறகு முதன் முறையாக சபா சட்டமன்றத்தில் DAP-க்கு பிரதிநிதித்துவம் எதுவும் இல்லாத நிலை ஏற்பட்டுள்ளது.
