கங்கார், மே 19 – நாட்டிற்குள் சுடும் ஆயுதங்களை கடத்திவருவதற்கு கடத்தல்காரர்கள் பல்வேறு தந்திரங்களுடன் காய்கறி லாரிகள், மீன் லாரிகள் மற்றும் கப்பல் கொள்கலன்களையும் பயன்படுத்தி வருகின்றனர். மேலும் சரக்கு சேவைகள், ரயில்கள் மற்றும் கடல் வழிகளைப் பயன்படுத்துவதோடு, ஆவணமற்ற புலம்பெயர்ந்தோரின் உதவியைப் பெறுவதும், மலேசியா-தாய்லாந்து எல்லையில் சட்டவிரோத கடக்கும் இடங்கள் வழியாக பதுங்கிச் செல்வதும் கண்டறியப்பட்டுள்ளது. மாநில எல்லையில் அதிகாரிகளால் மேற்கொள்ளப்பட்ட கைது மற்றும் பறிமுதல்களின்படி, போதைப் பொருட்களுடன் துப்பாக்கிகளும் பெரும்பாலும் கடத்தப்படுவதாக பெர்லீஸ் போலீஸ் தலைவர் டத்தோ முகமட் அப்துல் ஹலிம் ( Muhammad Abdul Halim ) கூறினார்.
பெரும்பாலான துப்பாக்கிகள் பெர்லிஸ்-தாய்லாந்து எல்லையில் உள்ள அதிகாரப்பூர்வ எல்லை சோதனைச் சாவடிகள் மற்றும் சட்டவிரோத வழிகள் வழியாக, நிலம் அல்லது கடல் வழியாக, கடத்தப்படுவதாக நம்பப்படுகிறது. 2022 ஆம் ஆண்டு முதல் கடந்த ஆண்டு வரையிலான புள்ளிவிவரங்களின் அடிப்படையில், மாநில எல்லை வழியாக ஐந்து துப்பாக்கி கடத்தல் சம்பவங்களை அதிகாரிகள் முறியடித்துள்ளனர். முன்னர் தடுத்து வைக்கப்பட்டுள்ள பல சந்தேக நபர்களிடம் நடத்தப்பட்ட விசாரணைகளில், பறிமுதல் செய்யப்பட்ட துப்பாக்கிகளில் பெரும்பாலானவை குற்றச் செயல்களில் தனிப்பட்ட பயன்பாட்டிற்காகவே பயன்படுத்தப்பட்டதாக தெரியவருகிறது. 2022 ஆம் ஆண்டு முதல் இந்த ஆண்டு ஜனவரி வரை மொத்தம் 201 உண்மையான துப்பாக்கிகளை போலீஸ் பறிமுதல் செய்துள்ளது.
மாநிலத்தில் உள்ள அனைத்து துப்பாக்கி பறிமுதல் சம்பவங்களிலும் தானியங்கி கைத்துப்பாக்கிகள், அதனுடன் கூடிய வெடிமருந்துகள், வீட்டில் தயாரிக்கப்பட்ட கைத்துப்பாக்கிகள் மற்றும் AR15 மற்றும் M16 போன்ற முழுமையற்ற துப்பாக்கிகள், பாகங்கள் மற்றும் பல்வேறு வகையான தோட்டாக்கள் ஆகியவையும் பறிமுதல் செய்யப்பட்டற்றில் என்று முகமட் (Muhammad) தெரிவித்தார்.
