மலேசிய சுகாதார பராமரிப்புச் சேவைக்கு ஆபத்து? மலேசிய மருத்துவ நிபுணர்களைத் தருவிக்கும் ஆர்வத்தை சிங்கப்பூர் உறுதிப்படுத்தியது
சிங்கப்பூர், நவம்பர்-28 – சிங்கப்பூர், அதன் வெளிநாட்டு மருத்துவர்கள் ஆட்சேர்ப்பு திட்டத்தில் மலேசியாவும் உள்ளதாக அதிகாரப்பூர்வமாக உறுதிப்படுத்தியுள்ளது.
அக்குடியரசு பெரும்பாலும் உள்ளூர் மருத்துவர்களையே நம்புகிறது; என்றாலும் தேவை ஏற்பட்டால், வெளிநாடுகளில் இருந்து குறிப்பாக மலேசியா, இந்தியா, இங்கிலாந்து மருத்துவ நிபுணர்களைத் தருவிக்கவும் தயார் என, சிங்கப்பூர் சுகாதார அமைச்சர் தெரிவித்தார்.
எனினும் அது சிறிய எண்ணிக்கையாகவே இருக்கும் என்றார் அவர்.
சிங்கப்பூரில் தற்போதுள்ள 3 மருத்துவக் கல்லூரிகள் ஆண்டுக்கு சுமார் 550 மருத்துவர்களை உருவாக்குது குறிப்பிடத்தக்கது
மலேசிய மருத்துவ நிபுணர்கள் மற்றும் தாதியர்களுக்கு அதிக ஊதியம் வழங்கி சிங்கப்பூர் கவர முயற்சிப்பதாக நீண்ட காலமாகவே செய்திகள் பரவி வந்தன.
எனினும் சுகாதார அமைச்சான KKM அவற்றை மறுத்தது; காரணம் அது சிங்கப்பூர் அரசாங்கத்தின் முயற்சி அல்ல என்றும் மாறாக அந்நாட்டு தனியார் மருத்துவமனைகளின் முயற்சி மட்டுமே என்றும் விளக்கியது.
தற்போது சிங்கப்பூர் அரசாங்கமே தகவலை உறுதிப்படுத்தியிருப்பதால், மலேசியாவில் மருத்துவர் பற்றாக்குறை அதிகரிக்கலாம் என்ற கவலை மீண்டும் எழுந்துள்ளது.
ஏற்கனவே அரசாங்க மருத்துவமனைகள், பணியாளர் பற்றாக்குறையால் சிரமப்படும் நிலையில், இப்படி கவர்ச்சிகரமான சம்பளம் மற்றும் வேலைச் சூழல் காரணமாக மேலும் பல மருத்துவர்கள் சிங்கப்பூரை நோக்கி படையெடுக்கலாமென நிபுணர்கள் எச்சரிக்கின்றனர்.
