சிரம்பான், மே 22- வேப் அல்லது மின் சிகரெட்டுகளின் விற்பனையைத் தடை செய்வது குறித்து நெகிரி செம்பிலான்
மாநிலம் பரிசீலித்து வருகிறது. இந்த முடிவு பொது சுகாதாரம் மற்றும் நல்வாழ்வில், குறிப்பாக இளைஞர்களிடையே, அதன் பயன்பாட்டினால் ஏற்படும் பாதகமான விளைவுகளைக் கருத்தில் கொள்வதாக
மந்திரிபெசார் டத்தோஸ்ரீ அமினுடின் ஹருன் கூறினார்.
சுகாதார அமைச்சும் ஒரு முழுமையான தடையை முன்மொழிந்திருப்பதால் , இது ஒரு நன்மை பயக்கும் ஆலோசனையாக இருக்கலாம். மேலும் விவாதம் மற்றும் நடவடிக்கைக்காக இந்த விவகாரம் மாநில ஆட்சிக்குழு குழு கூட்டத்திற்கு கொண்டு வரப்படும் என அவர் தெரிவித்தார்.
மேஜிக் காளான்’ வேப் பொருட்களின் விற்பனைக்கு எதிராக கடுமையான அமலாக்கத்தையும் நான் வலியுறுத்துகிறேன், அதுதான் தீர்க்கப்பட வேண்டிய மிக முக்கியமான பிரச்சினை. இப்போதெல்லாம், அனைத்து வகையான தயாரிப்புகளும் உள்ளன, மின் சிகரெட்டுகள் இருந்தாலும் இதர சிகரெட்டுகளாக இருந்தாலும் அவை அனைத்தும் தீங்கு விளைவிக்கும் என அமினுடின் செய்தியாளர்களிடம் கூறினார்.
உள்ளூர் அதிகாரிகள் வேப் விற்பனை உரிமங்களை அங்கீகரிக்க வேண்டாம் என்றும் அவர் வலியுறுத்தினார், மேலும் இதுபோன்ற தயாரிப்புகளை விளம்பரப்படுத்தும் அடையாள பலகைகள் தொடர்பாக ஊராட்சி மன்ற அதிகாரிகள் சிறப்பாக ஒருங்கிணைந்து செயல்படுவார்கள் என்றும் அவர் நம்பிக்கைத் தெரிவித்தார்.
