சென்னை, நவம்பர்-24 – இசைஞானி இளையராஜாவின் உருவம் மற்றும் குரலை AI மூலம் உருவாக்கி பயன்படுத்த, சென்னை உயர் நீதிமன்றம் இடைக்காலத் தடை விதித்துள்ளது.
Amazon, YouTube, Facebook, Google, Sony Music உள்ளிட்ட எந்த டிஜிட்டல் தளங்களிலும் அவரின் அனுமதி இல்லாமல் AI படங்கள் அல்லது படியாக்கம் செய்யப்பட்ட குரலை வணிக நோக்கில் பயன்படுத்தக்கூடாது என நீதிமன்றம் உத்தரவிட்டது.
தனது தனிப்பட்ட உரிமையைப் பாதிக்கும் வகையில், சமூக ஊடகங்களில் ரீல்ஸ், மீம்ஸ் போன்றவற்றில் கூட அனுமதியின்றி தனது புகைப்படங்கள் பயன்படுத்தப்படுவதாகவும், எனவே அதற்குத் தடை விதிக்க வேண்டும் எனக் கோரி இளையராஜா முன்னதாக மனுதாக்கல் செய்திருந்தார்.
தன்னை அடையாளப்படுத்தும் வகையில் புகைப்படம், பெயர், ‘இசைஞானி ‘ என்ற பட்டம், குரல் என எதனையுமே பயன்படுத்தக் கூடாது எனவும், ஏற்கனவே பதிவிட்ட புகைப்படங்களை நீக்க வேண்டுமெனவும் இளையராஜ மனுவில் வலியுறுத்தினார்.
அதோடு, அனுமதியின்றி தனது புகைப்படங்களைப் பயன்படுத்தியன் வாயிலாக கிடைத்த வருமான விபரங்களையும் தாக்கல் செய்ய உத்தரவிட வேண்டுமென நீதிமன்றத்தை அவர் கேட்டுக் கொண்டார்.
மனுவை விசாரித்த நீதிபதி, இளையராஜாவின் தனிப்பட்ட உரிமைகள் மீறப்படக்கூடாது என வலியுறுத்தி அந்த இடைக்காலத் தடையை விதித்தார்.
