தாய்லாந்து, நவம்பர் 28 – தாய்லாந்து Hat Yai பகுதியில் ஏற்பட்ட கடுமையான வெள்ளத்தில் பாதிக்கப்பட்ட மலேசியர்களை வெளியேற்றும் பணிகள் சீராக நடைபெற்று வருவதாக வெளியுறவு அமைச்சு தெரிவித்துள்ளது. இதுவரை சுமார் 1,500 பேர் பாதுகாப்பான இடங்களுக்கு மாற்றப்பட்டுள்ளனர் என்று அறிவிக்கப்பட்டுள்ளது..
பாங்கோக்கிலுள்ள மலேசிய தூதரகம், Songkla பொதுத் தூதரகம், தாய்லாந்து தேசிய இராணுவ படை மற்றும் மலேசிய தன்னார்வ அமைப்புகள் இணைந்து இந்த மீட்பு பணிகளில் ஈடுபட்டு வருகின்றன.
மழை குறைந்து வருவதால் பல பகுதிகளில் வெள்ள நீரும் வற்றி வருகின்றது. அதனால் மீட்பு பணிகள் விரைவாக நடைபெற்று வருகின்றன.
38 மலேசிய மாணவர்கள் மற்றும் பேராசிரியர்கள் உட்பட மொத்தம் 1,459 மலேசியர்கள் 25-க்கும் மேற்பட்ட தங்கும் விடுதிகளிலிருந்து வெளியேற்றப்பட்டு, புக்கிட் காயூ ஹீத்தாம் எல்லைக்கு கொண்டு செல்லப்பட்டனர்.
தற்போது தாய்லாந்திற்குள் 300-க்கும் குறைவான மலேசியர்கள் மட்டுமே சிக்கியிருக்கலாம் என கணிக்கப்பட்டுள்ளதால் மீட்பு நடவடிக்கைகள் அனைவரும் பாதுகாப்பாக வெளியேற்றப்படும் வரை தொடரும் என அமைச்சு தெரிவித்துள்ளது.
