VM2026: ஸ்டார்பக்ஸ் நிறுவனத்துடன் Tourism Malaysia ஒத்துழைப்பதை அரசியலாக்காதீர் – தியோங் கோரிக்கை
கோலாலம்பூர், அக்டோபர்-31,
ஸ்டார்பக்ஸ் மலேசியாவுடனான Tourism Malaysia நிறுவனத்தின் புதிய வியூக ஒத்துழைப்பை, சுற்றுலா, கலை, பண்பாட்டு அமைச்சர் டத்தோ ஸ்ரீ தியோங் கிங் சிங் தற்காத்து பேசியுள்ளார்.
இது, ‘2026 மலேசியாவுக்கு வருகைப் புரியும் ஆண்டு’ பிரச்சார இயக்கத்தின் கீழ், சுற்றுலாவை மேம்படுத்துவதை நோக்கமாகக் கொண்டுள்ளது; எனவே யாரும் அதை அரசியலாக்கக்கூடாது என அவர் கேட்டுக் கொண்டார்.
அந்நோக்கத்திற்காக, ஸ்டார்பக்ஸ் மட்டுமல்ல, மேலும் ஏராளமான வர்த்தக முத்திரைகளுடன் தமதமைச்சு ஒத்துழைப்பதாக மக்களவையில் அவர் சொன்னார்.
Danish butter cookies பிஸ்கட்டுகள், மற்றும் முஸ்லீம்களுக்குச் சொந்தமான வாசனை திரவியங்கள் போன்ற பிற முத்திரைகளுடனும் அமைச்சு இதேபோல் ஒத்துழைப்பை மேற்கொண்டுள்ளது- ஆனால் அது குறித்து யாரும் கேள்வி எழுப்பவில்லையே என அவர் சுட்டிக்காட்டினார்.
எல்லாவற்றிலும் அரசியல் செய்தால், VM2026 இயக்கத்தின் நோக்கம் நிறைவேறாது என தியோங் நினைவுறுத்தினார்.
ஸ்டார்பக்ஸ் நிறுவனத்தைத் தேர்ந்தெடுப்பது உள்ளூர் வணிக முத்திரைகளைப் புறக்கணிக்கும் செயலாகும் என முன்னதாக கண்டனங்கள் எழுந்தன.
அதே சமயம் இஸ்ரேலுடனான தொடர்பையும் விமர்சகர்கள் சுட்டிகாட்டுகின்றனர்.
ஆனால், சுற்றுலா என்பது பன்முகத்தன்மை மற்றும் கலாச்சாரத்தைப் பற்றியதே தவிர, மோதல்கள் பற்றியதல்ல என தியோங் வலியுறுத்தினார்.
இதுபோன்ற ஒத்துழைப்புகளை அரசியல் போர்க்களங்களாக மாற்றுவதற்குப் பதிலாக மலேசியாவின் பல இடங்களை மேம்படுத்துவதில் கவனம் செலுத்துமாறு அனைத்து தரப்பினரையும் அவர் கேட்டுக் கொண்டார்.
