சிட்னி, நவ 27 – கிழக்கு ஆஸ்திரேலியாவின் நியூ சவுத் வேல்ஸில் உள்ள கடற்கரைக்கு அருகே இன்று அதிகாலையில் சுறா மீன் ஒருவரை தாக்கி கொன்றதோடு மற்றொருவரை கடுமையாக காயப்படுத்தியது என மீட்புப் பணியாளர்கள் மற்றும் போலீசார் தெரிவித்தனர். சுறாவால் தாக்கப்பட்ட பெண் சம்பவம் நிகழ்ந்த இடத்திலேயே உயிரிழந்தார். இச்சம்பவத்தில் ஆடவர் ஒருவர் காலில் கடுமையாக காயத்திற்குள்ளாகி மருத்துவமனைக்கு கொண்டு செல்லப்பட்டதாக தெரிவிக்கப்பட்டது. ஒதுக்குப்புறமான பகுதியில் நடந்த இந்த சம்பவம் மிகவும் கொடுரமானது என நியூ சவுத் வேல்ஸ் உயிர் காப்பு நிறுவனத்தின் நிர்வாகத் தலைவர் ஸ்டீவன் பியர்ஸ் ( Steven Pearce) விவரித்தார்.
சிட்னியில் இருந்து வடக்கே சுமார் 250 கிலோமீட்டர் தொலைவில் உள்ள க்ரௌடி ( Crowdy Bay ) விரிகுடாவில் உள்ள கடற்கரைக்கு அருகில் நடந்த தாக்குதல் குறித்து காலை 6.30 மணியளவில் அவசர சேவைகளுக்கு அழைப்பு வந்தது.ஆஸ்திரேலியாவில் சுறா தாக்குதல்கள் ஒன்றும் புதிதல்ல. 1791 முதல், ஆஸ்திரேலியா முழுவதும் 1,280க்கும் மேற்பட்ட சுறா தாக்குதல் சம்பவங்கள் நடந்துள்ளன, அவற்றில் 250க்கும் மேற்பட்டவை உயிரிழப்புகளை ஏற்படுத்தியுள்ளன.
