கோலாலம்பூர், நவ 28 – உள்நாடு மற்றும் வெளிநாட்டினரை குறிவைத்து ஆன்லைன் மோசடி சம்பந்தப்பட்ட அழைப்பு மைய நடவடிக்கைகளை எதிர்த்து கோலாலம்பூர் வணிக குற்றப்புலனாய்வுத்துறை நவம்பர் 10ஆம் தேதி முதல் 14ஆம்தேதிவரை மேற்கொண்ட நடவடிக்கையில் மொத்தம்
57 பேர் கைது செய்யப்பட்டனர்.
அவர்களில் உள்நாட்டைச் சேர்ந்த ஐவரும் அடங்குவர் .
சட்டவிரோதமாக செயல்பாட்டு மையங்களாக பயன்படுத்தப்பட்ட குடியிருப்புகள் மற்றும் கோலாலம்பூரைச் சுற்றியுள்ள பல இடங்களில் மேற்கொள்ளப்பட்ட நடவடிக்கையின்போது சந்தேகப் பேர்வழிகள் கைது செய்யப்பட்டனர்.
இவர்கள் அனைவரும் மோசடி கும்பலின் ஊழியர்கள் என்பதோடு மோசடி வேலை வாய்ப்புக்கள் மற்றும் வெளிநாடு குடிமக்களை இலக்காகக் கொண்டு, இல்லாத Cryptocurrency முதலீடுகள் உட்பட பல்வேறு முறைகேடுகளில் ஈடுபட்டவர்கள் என்று தொடக்க கட்ட விசாரணையில் கண்டறியப்பட்டது,
கைது செய்யப்பட்ட அனைவரின் மீதும் குற்றவியல் சட்டத்தின் பிரிவு 1208(2) இன் கீழ் ஆன்லைன் மோசடிக்கு உடந்தையாக இருந்ததற்காகவும், வெளிநாட்டினருக்கான பயண ஆவணங்கள் தொடர்பான குற்றங்களைச் செய்ததற்காகவும் 1959/63 குடிநுழைவுச் சட்டத்தின் கீழ் குற்றஞ்சாட்டப்பட்டது.
ஆன்லைன் அல்லது இணைய மோசடி கும்பல்களை முற்றிலுமாக ஒழிக்க முடியும் என்பதை உறுதி செய்வதற்காக போலீஸ்துறை தொடர்ந்து நடவடிக்கைகளைத் தீவிரப்படுத்தும்.
அதே வேளையில் எந்தவொரு நிதி பரிவர்த்தனைகளையும் மேற்கொள்வதற்கு முன்பு விழிப்புடன் இருக்கவும், அதிகாரிகளிடமிருந்து உறுதிப்படுத்தலைப் பெறவும் பொதுமக்களுக்கு அறிவுறுத்தப்படுகிறது.
