மெம்பாக்குட், நவம்பர் 19-தேசிய முன்னணியிலிருந்து விலகி எதிர்கட்சி கூட்டணியில் இணைய ம.இ.கா தேசியப் பொதுப்பேரவை தீர்மானம் நிறைவேற்றியது குறித்து, அக்கட்சித் தலைமையுடன் பேசப்படும்.
சபா சட்டமன்றத் தேர்தல் முடிந்த கையோடு அச்சந்திப்புக்கு ஏற்பாடு செய்யப்படுமென, தேசிய முன்னணித் துணைத் தலைவர் டத்தோ ஸ்ரீ மொஹமட் ஹசான் கூறினார்.
எந்தவோர் இறுதி முடிவும் எடுக்கும் முன்னர் ம.இ.கா ஆழமாக பரிசீலிக்கும் என தாம் நம்புவதாக, அம்னோ துணைத் தலைவருமான Tok Mat சொன்னார்.
அம்னோ, ம.சீ.சவுடன் ம.இ.கா நீண்ட கால நட்பைக் கொண்டுள்ளது; அது தொடர்ந்து நீடிக்க வேண்டும்.
எனவே மனஸ்தாபங்கள் இருந்தால் அதனை பேசி தீர்த்துக் கொள்வோம் என்றார் அவர்.
ஞாயிற்றுக்கிழமை நடைபெற்ற 79-ஆவது ம.இ.கா பொதுப்பேரவையில் துணைத் தலைவர் டத்தோ ஸ்ரீ எம். சரவணன் தாக்கல் செய்த 3 தீர்மானங்களில், ம.இ.கா தேசிய முன்னணியிலிருந்து வெளியேறி பெரிக்காத்தான் நேஷனல் கூட்டணியில் இணைய முறைப்படி விண்ணப்பிப்பதும் அடங்கும்.
அத்தீர்மானங்கள் பேராளர்களால் ஏகமனதாக நிறைவேற்றப்பட்டன.
ஆனால், அதில் இறுதி முடிவெடுக்கும் அதிகாரத்தை தேசியத் தலைவர் தான் ஸ்ரீ எஸ். ஏ. விக்னேஸ்வரன் மற்றும் மத்திய செயலவையிடம் பேராளர்கள் கொடுத்துள்ளனர்.
அடுத்த மத்திய செயலவைக் கூட்டத்தில் ம.இ.காவின் எதிர்காலம் முடிவாகுமென எதிர்பார்க்கப்படுகிறது.
