கோலாலம்பூர், ஆகஸ்ட் 13 – சிலாங்கூர், ஷா அலாமில் வரி செலுத்தப்படாத ஒரு மில்லியன் ரிங்கிட் மதிப்புள்ள பல்வேறு வகை மதுபானங்கள் வைக்கப்பட்டிருந்த கையிருப்பு கிடங்கு செயல்பட்டு வந்ததை பொது நடவடிக்கை குழுவினர் அம்பலப்படுத்தியுள்ளனர் .
ஷா அலாமிலுள்ள ஒரு கிடங்கில் மேற்கொள்ளப்பட்ட ஒருங்கிணைந்த நடவடிக்கையின் மூலம் பல்வேறு வகையான பீர் மற்றும் இதர மதுபானங்கள் கண்டுப்பிடிக்கப்பட்டதாக உள்நாட்டு பாதுகாப்பு, பொது அமைதி மற்றும் பொது நடவடிக்கை பிரிவின் துணை இயக்குநர் டத்தோ முகமட் சுஸ்ரின் முகமட் ரோடி ( Mohamad Suzrin Mohamad Rodhi ) தெரிவித்தார்.
ஷா அலாம் குற்ற புலன் விசாரணைத்துறையின் உதவியோடு புக்கிட் அமான் பொது நடவடிக்கை பிரிவின் தலைமையகம், மற்றும் ஷா அலாம் மாநகர் மன்றம் ஆகியவைற்றின் ஒத்துழைப்போடு இந்த நடவடிக்கை மேற்கொள்ளப்பட்டது.
38 மற்றும் 63 வயதுடைய உள்நாட்டைச் சேர்ந்த இருவருடன் 29 வயதுடைய மியன்மார் பிரஜையும் இந்த நடவடிக்கையின்போது கைது செய்யப்பட்டனர். மேலும் 10 டன் லோரி, 57,816 டின்களில் அடைக்கப்பட்ட மதுபானங்கள் , நான்கு கை தொலைபேசிகள் ஆகியவை பறிமுதல் செய்யப்பட்டன.
இவற்றின் மொத்த மதிப்பு 12 லட்சத்து 32,966 ரிங்கிட்டாகும். மேலும் அந்த கிடங்கிற்கு 2,000 ரிங்கிட் அபராதத்தைக் கொண்ட குற்றப் பதிவு நோட்டிஸ் ஒன்றையும் ஷா அலாம் மாநகர் மன்றம் வழங்கியது.
