கோலாலம்பூர், நவ 24 – மஇகா தேசியத் தலைவரும் MIED அறவாரியத் தலைவருமான டான்ஸ்ரீ SA விக்னேஸ்வரன்
SPM மாணவர்கள் நம்பிக்கையுடன் தேர்வு எழுத வேண்டும் என்று கேட்டுக் கொண்டுள்ளார்.
கல்வியில் வழிகாட்ட மஇகா-MIED காத்திருப்பதால் முழு முயற்சியையும் ஒன்று திரட்டி SPM தேர்வை எழுதவேண்டும்.
இன்று நவம்பர் 25-ஆம் தேதி தொடங்கும் SPM தேர்வுகளுக்கு அமரும் அனைத்து மலேசிய மாணவர்களுக்கும் குறிப்பாக இந்திய மாணவர்களுக்கு தனது நல்வாழ்த்துகளையும் விக்னேஸ்வரன் தெரிவித்துக் கொண்டார்.
மாணவர்களின் கல்விப் பயணத்தில் எஸ்.பி.எம் என்பது ஒரு முக்கியமான காலக்கட்டம்.
இதில் சிறந்த தேர்ச்சி பெற்று அடுத்த கட்டத்திற்கு முன்னேறுவதன் மூலம் தங்களின் பெற்றோர்களுக்கும் ஆசிரியர்களுக்கும், படித்த பள்ளிக்கும் மட்டும் பெருமை சேர்க்காமல் நமது இந்திய சமுதாயத்திற்கும் பெருமையும் கௌரவமும் சேர்க்கிறீர்கள் என்பதை மாணவர்கள் உணர வேண்டும் என அவர் வலியுறுத்தினார்.
தமிழ் மொழி இந்த நாட்டில் பள்ளிகளிலும், உயர்நிலைக் கல்விக் கழகங்களில் என்றும் நிலையாக நிலைத்திருப்பதற்கு ஒரு காரணம் தமிழ்ப்பள்ளிகள் என்றால், மற்றொரு காரணம் தமிழ் மொழி கல்வி ரீதியாகத் தொடர்ச்சி பெறுவதற்கு இடைநிலைப் பள்ளிகளில் குறிப்பாக SPM தேர்வுகளில் தமிழ் மொழியையும், தமிழ் இலக்கியத்தையும் ஒரு பாடமாக எடுக்கும் இந்திய மாணவர்களாகும்.
எனவே SPM தேர்வுகளில் தமிழ் மொழி, தமிழ் இலக்கியப் பாடங்களை எடுக்கும் இந்திய மாணவர்களும் அந்தப் பாடங்களில் சிறந்த தேர்ச்சி பெற வேண்டும்.
அதே வேளையில் மஇகா மூலம் தோற்றுவிக்கப்பட்ட MIED கல்வி அறவாரியம் வசதி குறைந்த இந்திய மாணவர்களுக்கு கரங்கொடுத்து உதவக் காத்திருக்கிறது.
இந்திய மாணவர்கள் தங்களின் தகுதிக்கேற்ப விருப்பமானத் துறைகளைத் தேர்ந்தெடுத்துப் பயில, ஏய்ம்ஸ்ட் பல்கலைக் கழகம் தன் கதவுகளைத் திறந்து வைத்துக் காத்திருக்கிறது.
SPM தேர்வுகளை அடுத்து TVET என்னும் தொழிற்பயிற்சி கல்வியைத் தொடர விரும்புபவர்களுக்கு பிரம்மாண்டமான அளவில் சிரம்பான், Tafe கல்லூரி வளாகம் புதுப்பிக்கப்பட்டு தயாராகிக் கொண்டிருக்கிறது.
எனவே, இந்திய மாணவர்கள் அனைவரையும் கல்வித் துறையில் எல்லா வகையிலும் வழிகாட்ட மஇகாவும் MIEDடியும் எப்போதும் தயாராக இருப்பதாகவும் விக்னேஸ்வரன் தெரிவித்தார்.
