நிபோங் தெபால், நவம்பர்-29 – ‘வாடிக்கையாளர் சேவை மையம்’ என்ற போர்வையில் ஜப்பானியர்களைக் குறி வைத்து பினாங்கில் செயல்பட்டு வந்த மோசடி கும்பலொன்று கூண்டோடு சிக்கியுள்ளது.
நிபோங் தெபால், சிம்பாங் அம்பாட்டில் உள்ள 2 பங்களா வீடுகளில் நவம்பர் 20-ஆம் தேதி மேற்கொள்ளப்பட்ட அதிரடிச் சோதனைகளில், 1 பெண் உட்பட 18 பேர் கைதாகினர்.
அவர்களில் 14 பேர் ஜப்பானியப் பிரஜைகள்; எஞ்சிய நால்வர் சீன நாட்டவர்கள் ஆவர் என பினாங்கு போலீஸ் கூறியது.
RM 5,000 முதல் RM 8,000 வரையிலான சம்பளத்தில் கடந்த 3 மாதங்களாக அங்கு ‘call centre’ பணியாளர்களாக வேலை செய்து வந்ததை சந்தேக நபர்கள் ஒப்புக் கொண்டனர்.
டெலிகிராம் வாயிலாக விவரங்களைப் பெற்று, ஜப்பானிய போலீஸ் அதிகாரிகளாக ஆள்மாறாட்டம் செய்து, ஜப்பானியர்களை ஏமாற்றுவதே இவர்களுக்கு கொடுக்கப்பட்ட வேலை.
மோசடி வலையில் சிக்கியவர்களிடம், Go என்ற ஜப்பானிய செயலி வாயிலாக இக்கும்பல் பணத்தை ‘கறந்து’ விடுவது விசாரணையில் அம்பலமானது.
இதையடுத்து பல்வேறு முத்திரைகளிலான 49 கைப்பேசிகள், 13 iPad சாதனங்கள், 3 மடிக்கணினிகள், 4 ‘walkie talkie’ கருவிகள், 25 பக்கங்களுக்கு ஜப்பானிய மொழியில் எழுதப்பட்ட மோசடி வசனங்கள் உள்ளிட்டவை பறிமுதல் செய்யப்பட்டன.
கைதானவர்கள், மோசடி குற்றங்களுக்கான 420-ஆவது சட்டப் பிரிவின் கீழ் விசாரிக்கப்படும் நிலையில், முன்பின் தெரியாதோரிடமிருந்து வரும் அழைப்புகள் குறித்து அதிக கவனத்தோடு இருக்குமாறு பொது மக்களைப் போலீஸ் அறிவுறுத்தியுள்ளது.
