கோலாலாம்பூர், நவம்பர்-28 – இவ்வார தொடக்கத்தில் விளையாட்டுச் செய்தியாளர் ஹரேஷ் டியோலைத் தாக்கிய குற்றத்தை, 37 வயது நபர் ஒருவர் இன்று கோலாலாம்பூர் மாஜிஸ்திரேட் நீதிமன்றத்தில் ஒப்புக்கொண்டார்.
நவம்பர் 25-ஆம் தேதி ஜாலான் தெலாவி தீகாவில் உள்ள தஞ்சோங் பாலாய் குழும வளாகத்திற்கு வெளியே, பெயர் குறிப்பிடப்படாத ஒரு சந்தேக நபருடன் சேர்ந்து, ஆர். கிருஷ்ணன் இந்தக் குற்றத்தைச் செய்துள்ளார்.
வேண்டுமென்றே காயப்படுத்தியதாக, குற்றவியல் சட்டத்தின் கீழ் குற்றச்சாட்டு சுமத்தப்பட்டது.
குற்றம் நிரூபிக்கப்பட்டால் அதிகபட்சம் ஒரு வருட சிறைத்தண்டனை மற்றும் RM2,000 வரை அபராதம் விதிக்கப்படலாம்.
எனினும், வரும் ஜனவரி 22-ஆம் தேதியே தண்டனை விவரங்கள் அறிவிக்கப்படுமென நீதிபதி தெரிவித்தார்.
இதையடுத்து, 2,000 ரிங்கிட் மற்றும் ஒரு நபர் உத்தரவாதத்தின் பேரில் அந்நபர் ஜாமீனில் விடுவிக்கப்பட்டார்.
Twentytwo13 இணைய செய்தி ஊடகத்தின் இணை நிறுவனருமான ஹரேஷ் டியோல், பங்சாரில் தனது காருக்குள் ஏற முயன்ற போது 2 மர்ம நபர்களால் தாக்கப்பட்டார்.
