பேராக், நவம்பர் 29 – பேராக் மாநிலத்தில், கடந்த ஒன்பது மாதங்களில், ஊராட்சி மன்றங்கள் மேற்கொண்ட நடவடிக்கையில், 6,000-க்கும் மேற்பட்ட தெருநாய்கள் பிடிக்கப்பட்டதாக மாநில வீடமைப்பு மற்றும் ஊராட்சி மன்ற ஆட்சிக் குழு உறுப்பினர் Sandrea Ng தெரிவித்தார்.
மொத்தம் 3,000-க்கும் மேற்பட்ட அதிரடி நடவடிக்கைகளில் 6,338 நாய்கள் பிடிக்கப்பட்டுள்ளதாக அவர் மேலும் தெரிவித்தார்.
அதிகாரிகளால் பிடிக்கப்பட்ட நாய்களை உரிமையாளர்கள் அல்லது தொடர்புடைய அரசுச் சாரா இயக்கங்கள் குறிப்பிட்ட காலத்திற்குள் முறையான கோரிக்கையின் வாயிலாக கொண்டுச் செல்லலாம் என்றும் தெரிவிக்கப்பட்டுள்ளது.
அக்காலகட்டத்திற்குள் நாய்கள் கொண்டுச் செல்லப்படாவிட்டால், அவை நாய்கள் கால்நடை சேவைத்துறைக்கு அனுப்பப்படும் என்றும் அங்கு அவற்றின் நிலை மதிப்பிடப்பட்டு தகுந்த நடவடிக்கை எடுக்கப்படும்.
பேராக் மாநில Pawsitive இயக்கத்தின், பிரச்சார விளக்கக்குறிப்புகளை வெளியிட்ட சாண்ட்ரியா ங், தெருநாய்கள் பிரச்சனையில் சமூகத்துக்கும் பொறுப்பு உண்டு என்பதால் மாநிலம் மனிதாபிமானமான தீர்வுகளை வலுப்படுத்தி வருவதாக தெரிவித்தார்.
உரிமம் இல்லாத நாய்களுக்கு அபராதம் விதிக்கப்படுமென எச்சரித்த Sandrea, இவ்வாண்டு ஜனவரி முதல் நவம்பர் வரை 13,816 நாய் உரிமங்கள் வழங்கப்பட்டுள்ளன என்றும் தெரிவித்தார்.
