கோலாலம்பூர், நவம்பர் 27 – மின்சார திருட்டு காரணமாக தேசிய மின்சார வாரியம் அதாவது TNB இதுவரை 5.14 பில்லியன் ரிங்கிட் தொகையை இழந்துள்ளதாக துணை பிரதமர் ஃபடீலா யூசுப் (Fadillah Yusof) தெரிவித்தார்.
2020 முதல் 2025 வரை நடத்தப்பட்ட 91 சிறப்பு சோதனைகளில் 14,489 இடங்கள் பரிசோதிக்கப்பட்டதில் 85 வளாகங்கள் மின்சார திருட்டின் பாதிப்புக்குள்ளானவை என உறுதிப்படுத்தப்பட்டது. அவ்வளாக உரிமையாளர்கள் குற்றத்துடன் தொடர்பில்லாதவர்கள் என்பதால் அவர்கள் மீது வழக்கு தொடரப்படவில்லை.
வீடு மற்றும் தொழில் வளாகங்களை வாடகைக்கு விடும் உரிமையாளர்கள் கவனமாக இருக்க வேண்டும் எனவும் மின்சார இணைப்புகள் வாடகையாளர்களின் பெயரில் மட்டுமே எடுக்கப்பட வேண்டுமெனவும் வலியுறுத்தப்பட்டது.
இந்நிலையில் மின்சார திருட்டையும் அடையாள மோசடிகளையும் தடுக்கும் நோக்கில் TNB MyKad மற்றும் கைரேகை அடிப்படையிலான eKYC அதாவது அடையாள சரிபார்ப்பு முறை அறிமுகப்படுத்தபட்டுள்ளது.
இதில் MyKad அல்லது பாஸ்போர்ட்டை ஸ்கேன் செய்து முக அடையாளம் முதலில் உறுதிச்செய்யப்பட வேண்டும். இந்த அமலாக்கத்தின் வாயிலாக 2021-இல் 92 ஆக இருந்த போலி அடையாள சம்பவங்கள் 2024ல் வெறும் 3 ஆக மட்டுமே பதிவாகியுள்ளன.
கோலாலம்பூரில் முழுமையாக செயல்படுத்தப்படும் இந்த அமலாக்க முறை விரைவில் நாடு முழுவதும் விரிவாக்கம் செய்யப்படும். அதே நேரத்தில் அரசு இதே முறையை எதிர்காலத்தில் ஆன்லைன் பரிவர்த்தனைகளுக்கும் பயன்படுத்த திட்டமிட்டுள்ளது.
