வெனிஸ், நவம்பர்-24 – பிரபல நடிகரும் கார் பந்தய வீரருமான அஜித் குமாருக்கு ‘2025- ஆம் ஆண்டுக்கான ஜென்டில்மேன் ஓட்டுநர் விருது’ வழங்கி கௌரவிக்கப்பட்டுள்ளது.
மறைந்த தொழில்முனைவரும் கார் பந்தய வீரருமான Philippe Charriol நினைவாக அவருக்கு அவ்விருது வழங்கப்பட்டது.
இத்தாலி, வெனிஸ் நகரில் இந்த விருது விழா நடைபெற்றது.
இது, கைகடிகார நிறுவன உரிமையாளரும் பிரபல கார் பந்தய வீரருமான Philippe Charriol நினைவாக அவரது மனைவி நடத்தும் விருது விழாவாகும்.
5 வருடங்களுக்கு முன் கார் பந்தயத்தில் Philippe Charriol உயிரிழந்த நிலையில் அவர் நினைவாக இவ்விருது விழா நடத்தப்படுகிறது.
இந்நிலையில் இவ்வாண்டுக்கான விருது அஜித்துக்கு வழங்கப்பட்டது குறித்து அவரின் மனைவி ஷாலினி இன்ஸ்டாகிராம் பக்கத்தில் நெகிழ்ச்சியுடன் பதிவிட்டுள்ளார்.
“விருது வாங்கிய கணவரின் பக்கத்தில் நிற்க பெருமைப்படுகிறேன்” என ஷாலினி குறிப்பிட்டார்.
அஜித், ஷாலினி, மகள், மகன் என குடும்பமாக எடுத்துக் கொண்ட புகைப்படத்தையும் அவர் பகிர்ந்துள்ளார்.
அப்பதிவைப் பார்த்த அஜித்தின் தீவிர இரசிகர்கள் இந்த 2025-ஆம் ஆண்டை சிறப்பான ஆண்டாக கொண்டாடி தீர்க்கின்றனர்.
இவ்வாண்டு ஐரோப்பாவாவில் நடைபெற்ற கார் பந்தயங்களில் அஜித்தின் அணி குறிப்பிடத்தக்க வெற்றியைப் பெற்றது.
தவிர, இந்திய அரசாங்கத்தின் மூன்றாவது மிக உயரிய விருதான பத்ம பூஷனும் அவருக்கு வழங்கப்பட்டது.
இவ்வாண்டு அவர் நடிப்பில் வெளியான படங்களும் நல்ல வெற்றியைப் பெற்றிருப்பதால் அஜித் இரசிகர்கள் பெரும் மகிழ்ச்சியில் திளைத்துள்ளனர்.
அஜித் அடுத்து ஆதிக் ரவிசந்திரன் இயக்கத்தில் AK64 படத்தில் நடிக்கிறார்.
