கோலாலம்பூர், நவம்பர்-27,
அமெரிக்கா–மலேசியா இடையே கையெழுத்தான ART வாணிப ஒப்பந்தத்தின் கீழ், அமெரிக்க நிறுவனங்களுக்கு பூமிபுத்ரா (Bumi) அந்தஸ்து அளிக்கப்பட்டுள்ளதாக, முன்னாள் பிரதமர் துன் Dr மகாதீர் முஹமட் பரபரப்பு குற்றச்சாட்டை முன்வைத்துள்ளார்.
இந்த ஒப்பந்தம் அமெரிக்க நிறுவனங்களுக்கு மலேசியச் சந்தையில் மிகப்பெரிய சலுகைகள், எளிதான அணுகல், குறைந்த தடைகள் போன்ற பல நன்மைகள் தருவதாக அவர் கூறினார்.
அவ்வொப்பந்தம், முதலில் அமெரிக்கப் பொருட்களை வாங்குவதற்கு மலேசியாவை கட்டாயப்படுத்தும்…. அதுவே காலப்போக்கில் இந்நாட்டின் வருங்கால வாணிபக் கொள்கைகளை முடிவுச் செய்யும் அதிகாரத்தை வாஷிங்டனுக்குக் கொடுத்து விடும் என மகாதீர் அச்சம் தெரிவித்தார்.
அப்பட்டமாக சொல்வதென்றால் அவ்வொப்பந்தம் நாட்டை அமெரிக்காவுக்கு தாரை வார்த்து விட்டதாக, நேற்று நடத்திய செய்தியாளர் சந்திப்பில் மகாதீர் காட்டமாகக் கூறினார்.
பிரதமர் டத்தோ ஸ்ரீ அன்வார் இப்ராஹிம் முதலில் சட்ட வல்லுநர்களையோ அல்லது நாடாளுமன்றத்தையோ அணுகி கலந்துபேசி அறிவுரை பெற்றிக்க வேண்டும்; அதை அவர் செய்யத் தவறியுள்ளார்.
எனவே நாட்டுக்கு ‘துரோகம்’ இழைத்து விட்டதாகக் கூறி அன்வாருக்கு எதிராக நாடளாவிய நிலையில் அரசு சாரா இயக்கங்களின் கூட்டணி போலீஸ் புகார் செய்யுமென மகாதீர் குறிப்பிட்டார்.
அன்வாருக்கு எதிராக ஆண்டு இறுதிக்குள் ‘Turun Anwar 2.0’ போராட்டத்தில் குதிக்கவும் அந்த NGO-க்கள் கூட்டணி திட்டமிட்டுள்ளதாம்.
அமெரிக்காவுடனான ஒப்பந்தம் மலேசியாவின் இறையாண்மைக்கு எதிரானது அல்ல என்றும், தேவைப்பட்டால் அதனை இரத்துச் செய்து கொள்ளலாம் என்றும் அன்வார் ஏற்கனவே தெளிவுப்படுத்தியுள்ளது இங்கு குறிப்பிடத்தக்கது.
