கோலாலம்பூர், நவ 27- அமெரிக்காவுடன் மலேசியா கையெழுத்திட்ட வர்த்தக உடன்பாட்டில் பூமிபுத்ரா உரிமைகள் சமரசம் செய்துகொள்ளப்பட்டதாக கூறப்படும் கூற்றுகளுக்கு முதலீடு, வர்த்தகம் மற்றும் தொழில்துறை அமைச்சர் Tengku Zafrul Aziz பதிலடி கொடுத்துள்ளார்.
பேச்சுவார்த்தைகளின் போது இந்த தலைப்பு எல்லையை மீறும் செயல் என அவர் கூறினார்.
அமெரிக்க நிறுவனங்களுக்கு வர்த்தக உடன்பாட்டின் கீழ் பூமிபுத்ரா தகுதி வழங்கும் ஒரு பிரிவை சுட்டிக்காட்ட இதுபோன்ற கூற்றுக்களை முன்வைக்கும் எவருக்கும் தாம் சவால் விடுவதாக அவர் கூறினார்.
மலேசியா–அமெரிக்கா பரஸ்பர வர்த்தக உடன்பாடு குறித்து நாடாளுமன்ற உறுப்பினர்களுக்கு விளக்கமளிக்க நடைபெற்ற சிறப்பு நாடாளுமன்றக் கூட்டத்திற்குப் பிறகு அவர் ஊடகங்களிடம் இதனை தெரிவித்தார்.
மலேசியாவும் அமெரிக்காவும் கையெழுத்திட்ட பரஸ்பர வர்த்தக உடன்பாட்டின் கீழ் அமெரிக்க நிறுவனங்களுக்கு பூமிபுத்ரா தகுதி வழங்கப்பட்டுள்ளதாக முன்னாள் பிரதமர் துன் டாக்டர் Mahathir Mohamad நேற்று குற்றம் சாட்டியதோடு , இது மலேசியாவின் சுதந்திரத்திற்கு துரோகம் என்று குறிப்பிட்டிருந்தார்.
இந்த உடன்பாடு மலேசியாவை அமெரிக்காவிலிருந்து பொருட்களை வாங்க கட்டாயப்படுத்தும் என்றும், மலேசியாவின் எதிர்கால வர்த்தகக் கொள்கைகளில் Washington செல்வாக்கு செலுத்த அனுமதிக்கும் என்றும் Mahathir கூறியிருந்தார்.
இந்த வர்த்தக உடன்பாடு தேசிய இறையான்மையை கீழறுப்பு செய்வதாக Mahathir கூறியிருந்ததையும் Tengku Zafrul மறுத்தார்.
