கோலாலம்பூர், நவ 24 – பகுதி நேர வேலைக்கு கூடுதல் வருமானமும் கமிஷனும் கிடைக்கும் என கூறப்பட்ட வாக்குறுதியை நம்பிய பெண் குமஸ்தா ஒருவர் கிட்டத்தட்ட 100,000 ரிங்கிட் சேமிப்பு தொகையை மோசடி கும்பலிடம் இழந்தார். பாதிக்கப்பட்ட 44 வயதுடைய அந்த பெண் இந்த விவகாரம் குறித்து நேற்று மாலை மணி 4.49க்கு புகார் செய்துள்ளதாக கோலா தெரெங்கானு மாவட்ட போலீஸ் தலைவர் துணை கமிஷனர் அஸ்லி முகமட் நூர்
(Azli Mohd Noor ) கூறினார்.
நவம்பர் 13 ஆம் தேதி மாலை 6 மணியளவில் அப்பெண் தனது வீட்டில் இருந்தபோது, கூடுதல் வருமானம் ஈட்டுவது குறித்து வாட்ஸ்அப்பில் ஒரு தகவலை பெற்றுள்ளார். பின்னர் அவர் டெலிகிராம் குழுவிலும், RM205 என சிறப்பு பணிக்குழுவிலும் முகவராக சேர்க்கப்பட்டதோடு, ஒவ்வொரு பணிக்கும் செலவிடப்பட்ட மூலதனத்தில் 20 விழுக்காடு கமிஷன் வழங்கப்படும் என்று உறுதியளிக்கப்பட்டது.
இதனை நம்பி நவம்பர் 15 ஆம்தேதி முதல் 20ஆம்தேதி வரை, அப்பெண் பல வங்கிக் கணக்குகளுக்கு மொத்தம் 94,569 ரிங்கிட் பணத்தை பட்டுவாடா செய்துள்ளார். வாக்குறுதி அளிக்கப்பட்டபடி கமிஷன் எதுவும் வழங்கப்படாததால் பணத்தை மீட்பதற்கு முயன்றபோது அனைத்து பணத்தையும் மீட்பதாக இருந்தால் மேலும் 50,000 ரிங்கிட் கூடுதலாக செலுத்துமாறு கேட்கப்பட்டதால் தாம் ஏமாற்றப்பட்டதாக உணர்ந்த அப்பெண் இச்சம்பவம் குறித்து போலீசில் புகார் செய்தார். இதனைத் தொடர்ந்து இந்த விவகாரம் குற்றவியல் சட்டத்தின் பிரிவு 420 இன் கீழ் விசாரிக்கப்பட்டு வருவதாக அஸ்லி முகமட் நோர் கூறினார்.
