கோலாலம்பூர், நவம்பர்-24 – அடுத்தாண்டு முதல் 16 வயதுக்குட்பட்ட குழந்தைகளுக்கு சமூக ஊடகப் பயன்பாட்டைத் தடைச் செய்ய அரசாங்கம் திட்டமிட்டுள்ளது.
தொடர்புத்துறை அமைச்சர் டத்தோ ஃபாஹ்மி ஃபாட்சில் அதனைத் தெரிவித்தார்.
பாலியல் சீண்டல்களுக்கு அலையும் ஆசாமிகளிடமிருந்து குழந்தைகளைப் பாதுகாப்பது உட்பட, வயது கடந்த இணையக் குற்றங்களைத் தடுப்பதற்கான அமைச்சரவை முடிவின் அடிப்படையில் இந்தத் தடை விதிக்கப்படுவதாக, ஒற்றுமை அரசாங்கப் பேச்சாளருமான அவர் சொன்னார்.
பள்ளி மாணவர்களிடையே அதிகரித்து வரும் இணைய மிரட்டல், பாலியல் துன்புறுத்தல் மற்றும் ஒழுக்கப் பிரச்னைகள் குறித்த கவலைகளையும் இந்தத் தடை சரிசெய்ய முயலுகிறது.
இவை பெரும்பாலும், சமூக ஊடகத் தாக்கங்களுக்கு மிகச் சிறிய வயதிலேயே அதுவும் கட்டுப்பாடற்ற முறையில் ஆளாவதால் ஏற்படுகின்றன.
எனவே அடுத்தாண்டுக்குள் 16 வயதுக்குட்பட்ட குழந்தைகள் சமூக ஊடகக் கணக்குகளைத் திறப்பதைத் தடைசெய்யும் அரசாங்கத்தின் முடிவுக்கு சமூக ஊடகத் தளங்கள் இணங்கும் என அரசாங்கம் நம்புவதாக ஃபாஹ்மி கூறினார்.
அமுலாக்கம் ஆக்ககரமானதாக இருக்க, MyKad, கடப்பிதழ் அல்லது MyDigital ID போன்ற அதிகாரப்பூர்வ அடையாள ஆவணங்களைப் பயன்படுத்தி பதிவுச் செயல்முறையை செயல்படுத்த சமூக ஊடக தளங்களை கட்டாயப்படுத்துவதும் பரிசீலிக்கப்படும் என்றார் அவர்.
அரசாங்கம், ஒழுங்குமுறை அமைப்புகள், பெற்றோர்கள் என அனைவரும் தங்கள் பங்களிப்பைச் செய்தால், மலேசியாவில் இணையம் குறிப்பாக குழந்தைகள் மற்றும் குடும்பங்களுக்கு பாதுகாப்பானதாக இருக்கும் என ஃபாஹ்மி நம்பிக்கைத் தெரிவித்தார்.
