துபாய், நவம்பர்-28 – மலேசிய சுற்றுலா விளம்பர வாரியமான Tourism Malaysia, ‘2025 அரேபிய சுற்றுலா விருதளிப்பில்’ 2 முக்கிய விருதுகளை வென்றுள்ளது.
‘தென்கிழக்காசிய வட்டாரத்திற்கான சிறந்த தேசிய சுற்றுலா நிறுவனம்’ மற்றும் ‘பயண இலக்கை சந்தைப்படுத்துவதில் சிறந்த முனைப்பு’ ஆகிய விருதுகள், நவம்பர் 25-ஆம் தேதி துபாயில் நடைபெற்ற விழாவில் வழங்கப்பட்டன.
இவ்விருதுகளை Tourism Malaysia துபாய் கிளையின் இயக்குநர் Mohd Faharuddin Hatmin பெற்றுக் கொண்டார்.
இந்த அங்கீகாரங்கள், மத்திய கிழக்கு சந்தைக்கு மலேசியா ஒரு முன்னணி பயணத் தலமாக இருப்பதை வலுப்படுத்துவதாக, Tourism Malaysia தலைமை இயக்குநர் டத்தோ மனோகரன் பெரியசாமி கூறினார்.
VM2026 எனப்படும் ‘2026 மலேசியாவுக்கு வருகைத் தரும் ஆண்டை’ முன்னிட்டு மேற்கொள்ளப்படும் உயர் தாக்க விளம்பர மற்றும் சந்தைப்படுத்தல் முயற்சிகளுக்கு இது மேலும் ஊக்கமளிக்கும் என்றார் அவர்.
இவ்வாண்டு ஜனவரி முதல் ஆகஸ்ட் வரை மலேசியா 28.2 மில்லியன் அனைத்துலக வருகையாளர்களைப் பதிவுச் செய்துள்ளது.
இது 2024-கில் இதே காலக்கட்டத்துடன் ஒப்பிடும்போது 14.5% வளர்ச்சியாகும்.
இதனிடையே, VM2026-க்கு 47 மில்லியன் சுற்றுப்பயணிகள் என்ற இலக்கை வைத்துள்ள நிலையில், துபாயில் இருந்து கோலாலம்பூர் நோக்கி Batik Air தினசரி விமானங்கள் வரும் ஜனவரி 1 முதல் சேவையைத் தொடங்கும்.
Emirates, Etihad, Flydubai, Air Arabia உள்ளிட்ட விமானச் சேவைகளுக்கு ஈடாக இந்த Batik Air சேவையும் அமையுமென மனோகரன் சொன்னார்.
