கோலாலாம்பூர், நவம்பர்-28 – கோலாலாம்பூர் Pintasan Saloma அருகே அண்மையில் ஏற்பட்ட நீர்பெருக்கில் அடித்துச் செல்லப்பட்டு மரணமடைந்த சுரேஷ் கமலநாதனின் வாரிசுகள், PERKESO எனப்படும் சமூகப் பாதுகாப்பு நிறுவனத்தின் மரண சகாய நிதியைப் பெற தகுதிப் பெற்றுள்ளனர்.
PERKESO வெளியிட்ட அறிக்கையொன்றில் அது உறுதிப்படுத்தப்பட்டது.
குத்தகை நிறுவனமொன்றில் மேற்பார்வையாளராக வேலை செய்து வந்த 37 வயது சுரேஷ், LINDUNG Pekerja தொழிலாளர் பாதுகாப்புத் திட்டத்தின் கீழ் சந்தா செலுத்தி வந்துள்ளார்.
ஆகக் கடைசியாக இவ்வாண்டு ஏப்ரல் மாதம் அவரின் சந்தா பங்களிப்பு பதிவாகியுள்ளது; இதையடுத்து மே முதல் அக்டோபர் வரையிலான சந்தா பங்களிப்பு பாக்கி தொடர்பில் அவரின் முதலாளியை தொடர்புகொண்டு உரிய நடவடிக்கைகள் எடுக்கப்பட்டுள்ளன.
அதாவது, பாக்கி சந்தா முழுவதும் நவம்பர் 18-ஆம் தேதியே செலுத்தப்பட்டு விட்டது; இதன் மூலம் PERKESO சந்தா பங்களிப்பாளர் என்ற சுரேஷின் அந்தஸ்து நிலைநிறுத்தப்பட்டுள்ளதால், அவரின் வாரிசுகள் மரண சகாய நிதியைப் பெற தகுதியுடையவர்களாவதாக PERKESO கூறிற்று.
சுரேஷின் வாரிசுகள் – அவரின் 31 வயது மனைவி ஷாலினி தேவி பிரபாகரன் மற்றும் 6 வயது மகன் பிரதேஸ்வரன் ஆவர்.
இருவருக்கும் மாதம் 2,655 ரிங்கிட்டும், இறூதிச் சடங்கு செலவாக 3,000 ரிங்கிட்டும் வழங்கப்படுகிறது.
நவம்பர் 17-ஆம் தேதி நிகழ்ந்த சம்பவத்தில், நீர்பெருக்கிலிருந்து ஒரு MPV வாகனத்தை நகர்த்த முயன்ற போது சுரேஷ் கிள்ளான் ஆற்றில் அடித்துச் செல்லப்பட்டார்.
அவருடன் இருந்த இதர 12 பேர் காப்பாற்றப்பட்ட நிலையில், 4 நாட்களுக்குப் பிறகு காணாமல் போன இடத்திலிருந்து சுமார் 45 கிலோ மீட்டர் தொலைவில் அவரின் சடலம் கண்டெடுக்கப்பட்டது.
