கோலாலம்பூர், நவ 28 – 38 வயதான மலேசிய ஆடவன் ஒருவன் தன்னை Sugar Daddy என்று ஆன்லைனில் அடையாளம் காட்டிக்கொண்டு பாலியல் மோசடி மற்றும் மிரட்டி பணம் பறித்தல் ஆகிய நான்கு குற்றச்சாட்டுகளில் குற்றவாளி என சிங்கப்பூர் நீதிமன்றம் கண்டறிந்துள்ளது. ஜி.என். ராஜ்வந்த் சிங் என்ற அந்த நபர் , சிங்கப்பூர் பெண்களை மலேசியாவிற்கு அழைத்து வந்து , தன்னுடன் பாலியல் செயல்களில் ஈடுபட ஏமாற்றியதாக CNA செய்தி வெளியிட்டுள்ளது.
2018ஆம் ஆண்டுக்கும் மற்றும் 2020 ஆம் ஆண்டுக்குமிடையே வேலையில்லாமல் மலேசியாவில் தனது மனைவி மற்றும் குழந்தைகளுடன் வசித்து வந்தபோது, இந்தக் குற்றங்களைச் செய்ததாக ராஜ்வந்த் சிங் மீது மீது குற்றம் சாட்டப்பட்டது. அந்த ஆடவன் குற்றச்சாட்டை மறுத்து விசாரணை கோரினான் .
டேட்டிங் தளங்களில், ராஜ்வந்த், மைக் என்ற வெள்ளயர் இனத்தைச் சேர்ந்த ஆடவனாக நடித்து, வெற்றிகரமானவராகவும், ஒரு ஆடம்பர படகில் வாழ்வதாகவும்கூறி பாதிக்கப்பட்டவர்களுக்கு பாலியல் மற்றும் அவர்களின் தோழமைக்கு ஈடாக பணம் வழங்கி வந்துள்ளான். அதோடு அவர்களை பினாங்கிற்கு வர அழைப்பதற்கு முன்பு, பாதிக்கப்பட்டவர்கள் தங்களின் ஆபாச படங்கள் அல்லது வீடியோக்களை அனுப்பும்படி கட்டாயப்படுத்தியுள்ளான். மொத்தம் 16 பெண்கள் அவனுக்கு இரையாகிவிட்டதாகவும் கூறப்பட்டது.
சிங்கப்பூர் மற்றும் மலேசிய போலீஸ் மேற்கொண்ட கூட்டு நடவடிக்கையில் ராஜ்வந்த் சிங் கைது செய்யப்பட்டதோடு அவனுக்கு 13 ஆண்டுகள் சிறைத்தண்டனையும், 15 பிரம்படியும் விதிக்கும்படி அரசு தரப்பு வழக்கறிஞர் ஜெர்மி பின் நீதிமன்றத்தை வலியுறுத்தினார். அவனுக்கு ஜனவரி மாதம் தண்டனை விதிக்கப்படும்.
