ராவல்பிண்டி, நவம்பர்-28 – பாகிஸ்தானிய முன்னாள் பிரதமரும் கிரிக்கெட் சகாப்தமுமான இம்ரான் கான் சிறைச்சாலைக்குள்ளேயே கொல்லப்பட்டதாக பல்வேறு புகார்கள் பரவி வரும் நிலையில், அவர் பாதுகாப்பாகவும் நலமாகவும் இருப்பதாக சிறைச்சாலை அதிகாரிகள் தெரிவித்துள்ளனர்.
73 வயது இம்ரான் தேவையான மருத்துவ பராமரிப்புகளையும் பெற்று வருவதாக தெரிவிக்கப்பட்டது.
இம்ரான் கான் 2023 ஆகஸ்டில் ஊழல் வழக்கொன்றில் கைதுச் செய்யப்பட்டார்.
அரசாங்க பரிசு பொருட்களை சட்டவிரோதமாக விற்ற அவ்வழக்கில் அவருக்கு தண்டனை விதிக்கப்பட்டது.
அதன் பின்னர் அவர் அரசியல் தடை, பல ஊழல் வழக்குகள் மற்றும் மே 9 கலவரம் உள்ளிட்ட பல வழக்குகளுக்காக தொடர்ந்து சிறையிலேயே உள்ளார்.
இந்நிலையில், அவரது குடும்பத்தினரும் வழக்கறிஞர்களும் அண்மைய காலமாக அவரை சந்திக்க முடியவில்லை என கவலையை வெளிப்படுத்தினர்.
சிறைக்குள்ளேயே இம்ரானை அடித்து கொலைச் செய்து விட்டதாக வதந்திகள் பரவ, PTI கட்சித் தொண்டர்களும் ஆதரவாளர்களும் சிறை வாசலில் திரண்டனர்.
இதனால் சமூக வலைத்தளங்களில் “WhereIsImranKhan” என்ற hashtag பரவலாக ட்ரெண்ட் ஆகி வருகிறது.
இந்த நிலையில் தான்
சிறை நிர்வாகம் அறிக்கை வெளியிட்டு, இம்ரானை வேறு இடத்திற்கு மாற்றும் திட்டமில்லை எனவும் கூறியுள்ளது.
ஆனால், இம்ரானுக்கு சந்திப்பு மறுக்கப்படுவது சட்டவிரோத தனிமைப்படுத்தலாகும் என எதிர்கட்சிகள் குற்றஞ்சாட்டுகின்றன. இன்னொரு பக்கம் அவர் கொல்லப்பட்டு விட்டதாக எழும் யூகங்கள் அடங்கியபாடில்லை.
