கோலாலம்பூர், நவம்பர் 26 – பேரங்காடிகளில் play area என அழைக்கப்படும் விளையாட்டு மைதானத்தில் சொந்த மகனை சுமார் இரண்டரை மணி நேரத்திற்கு தனியாக விட்டுவிட்டு உணவருந்தச் சென்ற ஒரு பெற்றோர் தொடர்பான காணொளி நேற்று முதல் சமூக வலைதளங்களில் அதிவேகமாக பரவி வருகின்றது.
அக்காணொளியில், அங்கு தன் பிள்ளைகளை அழைத்து வந்த தந்தை ஒருவர் அந்த தம்பதியினரை கடுமையாக திட்டுவதையும், குழந்தையை ஏன் கண்காணிக்காமல் தனியாக விட்டுச் சென்றீர்கள் என்று கேள்வி எழுப்புவதையும் தெளிவாகக் காண முடிகிறது.
சிறுவன் பலமுறை விளையாட்டு பூங்காவிலிருந்து தனியாக வெளியேற முயன்றதை தான் தடுத்ததாக அந்த தந்தை மேலும் கூறினார்.
அவ்விரு கணவன் மனைவியும் குழந்தையை விட்டு விட்டு உல்லாசமாக சாப்பிட சென்றதை முன்னிட்டு சாப்பாடுதான் உங்களுக்கு முக்கியமா, குழந்தை காணாமல் போயிருந்தால் என்ன செய்திருப்பீர்கள் என்ற சரமாரியான கேள்விகளைக் கேட்டு அவர்களை வாயடைக்க செய்து விட்டார்.
குழந்தை பாதுகாப்பற்ற நிலையில் இருப்பதை கண்டு அப்பிள்ளையை யாரும் கெட்ட எண்ணத்திற்காக எளிதில் அணுகி விடக்கூடாது என்ற அச்சத்தில் கூடவே இருந்ததாகவும் குறிப்பிட்டார்.
இதனிடையே அந்த பெற்றோர்கள், தாங்கள் அருகிலேயேதான் இருந்தோம் என்று விளக்கமளித்தாலும் அந்த தந்தை அதை ஏற்க மறுத்து, பெற்றோரின் அலட்சியம் குழந்தையின் உயிருக்கு ஆபத்து என்று தொடர்ந்து வாதிட்டார்.
இந்த நிகழ்வை பார்த்த வலைதளவாசிகள் பெற்றோரின் நடத்தை குறித்து கடும் விமர்சனங்களையும் கண்டனங்களையும் தெரிவித்து வருகின்றனர்.
