வெள்ளத்தில் பாதிக்கப்பட்ட மக்களுக்கு குடிநுழைவுத்துறையின் இலவச மாற்று கடப்பிதழ் வழங்கும் சேவை

கோலாலம்பூர், நவ 28 – வெள்ளத்தில் பாதிக்கப்பட்டவர்களுக்கு குடிநுழைவுத்துறை இலவசமாக மாற்று கடப்பிதழை வழங்க முன்வந்துள்ளது. வெள்ளப் பேரிடரில் பாதிக்கப்பட்டவர்களுக்கான அதிகாரப்பூர்வ அலுவல்களை எளிதாக்குவதற்காக இந்த முயற்சி எடுக்கப்பட்டுள்ளதாக குடிநுழைவுத்துறையின் தலைமை
இயக்குநர் டத்தோ ஸாக்கரியா ஷாபான் ( Zakaria Shaaban ) தெரிவித்தார். பேரிடர் காரணமாக ஆவணங்களை இழந்த அல்லது சேதமடைந்த பாதிக்கப்பட்டவர்களுக்கு அனைத்துலக மலேசிய கடப்பிதழ்களை இலவசமாக மாற்ற மலேசிய குடிநுழைவுத்துறை முன்வந்துள்ளது. இந்த முயற்சி பாதிக்கப்பட்டவர்களின் விவகாரங்களை எளிதாக்குவதையும், பயணத் தேவைகள் மற்றும் உத்தியோகபூர்வ விவகாரங்கள் எந்த தடையும் இல்லாமல் தொடர முடியும் என்பதை உறுதி செய்வதையும் நோக்கமாகக் கொண்டுள்ளது என ஸக்கரியா இன்று வெளியிட்ட அறிக்கையில் தெரிவித்தார்.

ஆவணம் இன்னும் செல்லுபடியாகும் மற்றும் காலாவதியாகுவதற்கு குறைந்தது ஆறு மாதங்களுக்கு முன்பே இருந்தால் அருகேயுள்ள குடிநுழைவு அலுவலகங்களில் இலவச கடப்பிதழ்களை மாற்றாக பெற்றுக்கொள்ள விண்ணப்பம் செய்யலாம் . விண்ணப்பதாரர்கள் தங்கள் அடையாள கார்டு , அசல் கடப்பிதழ், இழந்த கடப்பிதழுக்கான போலீஸ் புகார் நகல் மற்றும் பாதிக்கப்பட்ட பகுதியில் ஏற்பட்ட வெள்ள சம்பவம் தொடர்பாக உள்ளூர் அதிகாரிகளிடமிருந்து பெறப்பட்ட உறுதிப்படுத்தும் அறிக்கையையும் குடிநுழைவு அலுவலகத்திற்கு கொண்டுவரும்படி கேட்டுக்கொள்ளப்படுகின்றனர்.