சிரம்பான், நவ 28 – மலாக்கா நீரிணையில் நேற்று சென்யார் ( Senyar ) வெப்பமண்டல புயல் நுழைந்தது கண்டறியப்பட்டதைத் தொடர்ந்து கடுமையான மழையுடன் பலத்த காற்று வீசியதால், நெகிரி செம்பிலான் மாநிலத்தில் சிரம்பான் மற்றும் போர்ட்டிக்சனில் நிலச்சரிவுகள் மற்றும் மரங்கள் விழுந்ததாக அறிவிக்கப்பட்டது.
இன்று அதிகாலை மணி 3.50 அளவில் சிரம்பான், தாமான் புக்கிட் பெர்லியானில் இரண்டு வீடுகளின் பின்னால் நிலச்சரிவு ஏற்பட்டதைத் தொடர்ந்து அந்த வீடுகளில் வசிக்கும் ஆறு பேர் வெளியேற்றப்பட்டதாக நெகிரி செம்பிலான் தீயணைப்பு மற்றும் மீட்புத் துறையின் (JBPM) பேச்சாளர் தெரிவித்தார்.
பின்னர் தீயணைப்புப் படையினர் மேலும் இடிந்து விழுவதைத் தடுக்க குடியிருப்பை காலி செய்ய உத்தரவிட்டனர்.
மற்றொரு சம்பவத்தில், அதிகாலை மூன்று மணியளவில் ஏயோன் மால் சிரம்பான் 2 இல் ஒரு மரம் விழுந்து போக்குவரத்துக்கு இடையூறு விளைவித்ததில் 61 வயது நபர் காயமடைந்தார். மோட்டார் சைக்கிளில் சென்ற பாதிக்கப்பட்ட நபர் மரத்தில் மோதியதாகக் கூறப்படுகிறது.
பாதிக்கப்பட்டவர் மேல் நடவடிக்கைக்காக துவாங்கு ஜாபர் மருத்துவமனைக்கு கொண்டு செல்லப்பட்டார். இன்று அதிகாலை மணி 3.10 போர்ட்டிக்சனில் புரோட்டான் சாகா காரில் மரம் விழுந்த சம்பவம் பதிவாகியுள்ளது. எனினும் அச்சம்பவத்தில் எவரும் காயம் அடையவில்லை. இதனிடையே கடுமையாக காற்று வீசியதில் போர்ட் டிக்சன் Immaculate Conception தேவாலயமும் சேதம் அடைந்ததாக கூறபடுகிறது.
