ஜோர்ஜ்டவுன், ஆகஸ்ட்-25-பினாங்கின் பத்து ஃபெரிங்கியிலுள்ள தங்கும் விடுதி ஒன்றில் நடத்தப்பட்ட அதிரடி சோதனையில், இணையக் காதல் மோசடி கும்பலைச் சேர்ந்த 20 வெளிநாட்டு ஆடவர்களைப் போலீஸார் கைதுச் செய்துள்ளனர்.
19 முதல் 41 வயதுக்குட்பட்ட இந்த சந்தேக நபர்கள், ஞாயிற்றுக்கிழமை இரவு 7 மணியளவில் கைதானதாக தீமோர் லாவோட் மாவட்டப் போலீஸ் தலைவர் Abdul Rozak Muhammad தெரிவித்துள்ளார்.
முதற்கட்ட விசாரணையில், இக்கும்பல் டெலிகிராம் செயலி வாயிலாக சீனாவைச் சேர்ந்த நபர்களைக் குறிவைத்து காதல் மோசடியில் ஈடுபட்டது தெரியவந்துள்ளது.
சோதனையின் போது ஏராளமான கைப்பேசிகள், மடிக்கணினிகள் மற்றும் தொலைத்தொடர்பு சாதனங்கள் பறிமுதல் செய்யப்பட்டன.
மோசடி மற்றும் குற்றச் சதித் திட்டப் பிரிவுகளின் கீழ் இந்த வழக்கு விசாரிக்கப்பட்டு வரும் நிலையில், கைதான 20 பேரும் வியாழக்கிழமை வரை 4 நாள் தடுப்புக் காவலில் வைக்கப்பட்டுள்ளனர்.
