செப்பாங், நவம்பர்-25 – அதிகாரிகளின் கண்களில் மண்ணைத் தூவி, உள்ளாடையில் போதைப்பொருளைக் கடத்த முயன்ற ஆடவர் KLIA 2 – வில் வசமாக சிக்கினார்.
தைவானியக் குற்றப் புலனாய்வுப் பிரிவின் உளவுத் தகவல்கள் அடிப்படையில் நவம்பர் 20-ஆம் தேதி, 40 வயதுடைய ஒரு வெளிநாட்டவரை போலீஸ் உன்னிப்பாகக் கண்காணித்தது.
காலை 7.40 மணியளவில், அவர் நாட்டை விட்டு வெளியேற முயன்றபோது, அதிகாரிகள் தடுத்து நிறுத்தினர்.
சோதனையில் அவரது உள்ளாடைக்குள் கிட்டத்தட்ட RM38,000 மதிப்புள்ள போதைப்பொருள் மறைத்து வைக்கப்பட்டிருப்பது தெரியவந்தது.
அவை முறையே 400 கிராம் ஹெரோயின் மற்றும் 7 கிராம் மெத் ஆகிய போதைப்பொருட்கள் என்பதை பின்னர் புலனாய்வாளர்கள் உறுதிப்படுத்தினர்.
அவை, வழக்கமாக கடத்தல் கும்பல்களால் பயன்படுத்தப்படும் body-packing முறைகளைப் பயன்படுத்தி உள்ளாடையில் மறைத்து வைக்கப்பட்டிருந்தன.
மலேசியாவிலிருந்து தைவானுக்கு போதைப்பொருள் கடத்துவோரை குறிவைத்து புக்கிட் அமானின் போதைப்பொருள் குற்றப் புலனாய்வுத் துறை மற்றும் தைவான் அதிகாரிகளுக்கு இடையிலான கூட்டு நடவடிக்கையின் ஒரு பகுதியாக, இக்கைது மேற்கொள்ளப்பட்டது.
சந்தேக நபர் கொடுத்த தகவலை அடுத்து புக்கிட் ஜாலிலில் உள்ள ஒர் அடுக்குமாடி குடியிருப்பில் மேற்கொள்ளப்பட்ட தொடர் சோதனையில், 3 வெளிநாட்டவர்கள் உட்பட மேலும் நால்வர் கைதாகினர்.
ஐவரும், அபாயகர போதைப்பொருள் சட்டத்தின் கீழ் விசாரிக்கப்பட ஏதுவாக தடுத்து வைக்கப்பட்டுள்ளனர்.
