பத்து மலை, நவம்பர்-27 – சிலாங்கூர் பத்து மலை ஆற்றங்கரை அருகே அண்மையில் ஏற்பட்ட தீ விபத்துக்குப் பிறகு, அவ்விடத்தை பொதுப்பணித் துறையான JKR எப்போது சுத்தம் செய்யும் என ஸ்ரீ மகா மாரியம்மன் தேவஸ்தானம் கேள்வி எழுப்பியுள்ளது.
அந்நிலம் JKR-ருக்குச் சொந்தமானது; ஆனால் தீ விபத்துக்குப் பிறகு அவ்விடத்தை அது இன்னமும் சுத்தம் செய்யாமல் வைத்துள்ளது.
இதனால், தேவஸ்தானமே அதன் சொந்த செலவில் மண்வாரி இயந்திரங்களை வைத்து அவ்விடத்தை துப்புரவு செய்து வருகிறது.
இந்நிலையில் தைப்பூசம் நெருங்கி வருவதால், அவ்விடத்தை சுத்தம் செய்ய நடவடிக்கை எடுக்கக் கோரி, தேவஸ்தான தலைவர் தான் ஸ்ரீ ஆர். நடராஜா பொதுப் பணி அமைச்சருக்கும் கடிதம் எழுதியுள்ளார்.
தைப்பூசம் மட்டுமின்றி முன்னணி சுற்றுலாத்தலமாகவும் விளங்கும் பத்து மலையின் தோற்றத்தை இது பாதிக்கக்கூடும் என்பதால், இவ்விவகாரத்தில் JKR உடனடி நடவடிக்கை எடுக்க அவர் வலியுறுத்தியுனார்.
தைப்பூசத்திற்கு வரும் பக்தர்களுக்கும் பொது மக்களுக்கும் எந்தவொரு பாதுகாப்பு அச்சுறுத்தலும் ஏற்படக் கூடாது என்ற கவலையையும் தேவஸ்தானம் வெளிப்படுத்தியது.
