தேசிய மிருகக்காட்சி சாலையின் புதிய ஈர்ப்பு; ‘Apoh’ கரும்புலி
கோம்பாக், பிப்ரவரி 9 – தேசிய விலங்குக் காட்சிசாலையில் ‘Apoh’ என்றழைக்கப்படும் 15 வயதுடைய ஆண் கரும்புலி தற்போது பார்வையாளர்களின் கவனத்தை ஈர்த்து வருகிறது. அதன் பருமனான உடலும் அழகான நடையும் சமூக ஊடகங்களில் அதிக கவனத்தைப் பெற்றுள்ளது.
சுமார் 80 கிலோகிராம் எடையுள்ள ‘Apoh’, மரங்களில் ஏறுதல் மற்றும் வெயிலில் அமர்ந்து பார்வையாளர்களைக் கவனித்தல் போன்ற கரும்புலிக்குரிய இயல்புகளைத் தொடர்ந்து காட்டி வருகிறது. தினமும் இரண்டு கிலோகிராம் கோழி இறைச்சியும், 500 கிராம் மாமிசமும் வழங்கப்படுவதுடன், மருத்துவ பரிசோதனைகளும் தொடர்ந்து நடைபெறுகின்றன.
முன்பு தனியாக வாழ்ந்த ‘Apoh’, இரண்டு ஆண்டுகளுக்கு முன்பு ‘Mek’ எனப்படும் பெண் கரும்புலியுடன் இணைக்கப்பட்டதன் பின்னர், அதன் உடல் எடை சற்றே குறைந்துள்ளதாக பராமரிப்பாளர்கள் தெரிவித்தனர்.
பார்வையாளர்கள் பலரும் ‘Apoh’-வை நேரில் காண ஆர்வம் காட்டி வருகின்றனர். சமூக ஊடகங்களில் பார்ப்பதைவிட, நேரில் காணும் அனுபவம் முற்றிலும் வேறுபட்டதாகவும், ‘Apoh’-வின் இயல்பான அசைவுகள் குடும்பத்தினருக்கு மகிழ்ச்சியளிப்பதாகவும் அவர்கள் தெரிவித்தனர்.
தேசிய விலங்குக் காட்சிசாலை நிர்வாகம், ‘Apoh’-வை விலங்கு பாதுகாப்பு மற்றும் கல்வி விழிப்புணர்வு திட்டங்களில் இணைக்க திட்டமிட்டுள்ளதாக அறிவித்துள்ளது.
