தோக்கியோ, நவம்பர் 28 – கடந்த செவ்வாய்க்கிழமை, ஜப்பான் தோக்கியோவில் 100 வயது தாயை பராமரித்து சோர்ந்து போன 79 வயது மகன், தனது தாயைக் கொன்ற சம்பவம் அப்பகுதி மக்களை அதிர்ச்சியில் ஆழ்த்தியுள்ளது.
அந்த நபர் தனது சொந்த தாயின் வாயை மூடி, அவரைத் தாக்கி கொலை செய்துள்ளதாக போலீஸ் தெரிவித்துள்ளது. பின்னர் அந்த ஆடவரே அவசர உதவி மையத்திற்கு அழைப்பு விடுத்ததாகவும் கூறப்படுகிறது.
மருத்துவமனைக்கு கொண்டு செல்லப்பட்ட அம்முதிய பெண் சிகிச்சை பலனின்றி உயிரிழந்தார். ஆரம்ப விசாரணையில், அந்த 79 வயது நபர் தனக்கு ஏற்பட்ட மிகுந்த சோர்வினால்தான் இவ்வாறு செய்ததாக போலீசாரிடம் ஒப்புக்கொண்டுள்ளார்.
ஜப்பானில் பிறப்பு விகிதம் குறைந்து, முதியவர்களின் எண்ணிக்கை அதிகரித்து ‘முதியோர் முதியோரை பராமரிக்கும்’ புதிய சமூக பிரச்சினை உருவாகியுள்ளது என்பது குறிப்பிடத்தக்கது.
இந்நிலையில் தோக்கியோவில் தாய்-மகன் இருவரும் தனியாக வசித்து வந்ததால், அவர்களின் வாழ்க்கை சூழ்நிலைகள் இந்த துயர சம்பவத்திற்கு காரணமாக இருந்ததாக போலீஸ் சந்தேகிக்கிறது.
