கோலாலம்பூர், அக்டோபர் 26 – மலேசியாவில் அதிகரித்து வரும் மனநலப் பிரச்சினைகளைச் சமாளிக்க, நாடு முழுவதுமுள்ள சுமார் 10,000 பதிவு செய்யப்பட்ட ஆலோசகர்களின் சேவையைப் பயன்படுத்த சுகாதார அமைச்சு திட்டமிட்டுள்ளது.
சுகாதார அமைச்சர் டத்தோ ஸ்ரீ டாக்டர் ஸுல்கெஃப்லி அஹ்மட் (Datuk Seri Dr Dzulkefly Ahmad) கூறுகையில், மனநலப் பிரச்சினைகளைக் கையாள்வதில் மனநல மருத்துவ நிபுணர்களுடன் ஆலோசகர்கள் உள்ளிட்ட பிற துறைசார் நிபுணர்களும் இணைந்து செயல்படுவார்கள் என்றார்.
மேலும், மலேசியாவிலுள்ள 1,116 சுகாதார கிளினிக்குகளிலும் மனநலச் சேவைகள் வழங்கப்படுகின்றன. அரசு மருத்துவமனைகள் மற்றும் சமூக மனநல மையங்களான மென்டாரி (MENTARI) மூலமாகவும் சிகிச்சைகள் வழங்கப்படுகின்றன.
தற்போது 69,000 மக்களுக்கு ஒரு மனநல மருத்துவர் என்ற விகிதம் உள்ளது. இதனை 40,000 மக்களுக்கு ஒரு மனநல மருத்துவர் என்ற நிலைக்குக் கொண்டுவர, மனநல மருத்துவ நிபுணர்களுக்கான பயிற்சிகளை விரிவுபடுத்தவும் அமைச்சு திட்டமிட்டுள்ளது.
