சண்டாகான், நவம்பர்-27,
தொழிலதிபர் Albert Tei அவதூறு பரப்பியதாகக் கூறி, பிரதமரின் முன்னாள் மூத்த அரசியல் செயலாளர் டத்தோ ஸ்ரீ Shamsul Iskandar Mohd. Akin போலீஸிஸ் புகார் செய்துள்ளார்.
சபா அரசியல்வாதிகளை இரகசியமாக வீடியோவில் பதிவுச் செய்த டத்தோ ஸ்ரீ அன்வார் இப்ராஹிம் தான் உத்தரவிட்டதாக குற்றச்சாட்டு எழுந்துள்ளது தொடர்பில் அப்புகார் செய்யப்பட்டது.
அடிப்படையற்ற அக்குற்றச்சாட்டு பிரதமர் மற்றும் மடானி அரசாங்கத்தின் மீது களங்கம் கற்பிக்கும் தீய நோக்கத்தைக் கொண்டதென, Shamsul அப்புகாரில் கூறினார்.
இதனிடையே, Shamsul Iskandar-ரின் பினாமியாக தாம் செயல்பட்டு வருவதாக எழுந்துள்ள பரபரப்பு புகாரை, ஒரு மாது திட்டவட்டமாக மறுத்துள்ளார்.
Albert Tei-யின் அக்குற்றச்சாட்டு அடிப்படையற்றது, அது வெறும் அவதூறு என Sofia Rini Buyong வீடியோ வாயிலாக வலியுறுத்தினார்.
Shamsul-லும் முன்னதாக அக்குற்றச்சாட்டை மறுத்திருந்தார்.
தாம் யாரையும் பினாமியாக நியமிக்கவில்லை என்றும், இந்த குற்றச்சாட்டு உண்மையான பிரச்னையிலிருந்து கவனத்தைத் திருப்பும் முயற்சி மட்டுமே என அவர் தெரிவித்தார்.
இந்த Albert Tei என்பவர், சபாவில் சுரங்க ஊழல் நடப்பதாக எழுந்த குற்றச்சாட்டுகளின் பின்னால் இருப்பவர் ஆவார்; லஞ்சம் கொடுத்ததன் பேரில் 2 குற்றச்சாட்டுகளில் அவர் விசாரிக்கப்பட்டு வருகிறார்.
முன்னதாக அவர் பதிவுச் செய்த வீடியோவில், பெண்ணொருவர் தாம் தான் Shamsul-லின் பினாமி என கூறுவது தெரிந்தது.
கனிமவள சுரங்க உரிமம் தொடர்பில் சபா அமைச்சர்கள், சட்டமன்ற உறுப்பினர்கள் உள்ளிட்டோருடன் பேசுவதை வீடியோவில் பதிவுச் செய்ய, Albert Tei-க்கு பிரதமர் டத்தோ ஸ்ரீ அன்வார் பச்சைக் கொடி காட்டியதாகவும் அப்பெண் கூறிக் கொண்டிருந்தார்.
Shamsul-லுக்குச் சொந்தமான சொத்துடைமைகளை மாற்றியமைத்தது உட்பட அந்த பி.கே.ஆர் தலைவருக்கு RM629,000 வரையில் வாரி இறைத்ததாகவும் Albert Tei கூறி பரபரப்பை ஏற்படுத்தியுள்ளது குறிப்பிடத்தக்கது.
தம்மைச் சுற்றி எழுந்துள்ள பல்வேறு புகார்கள் தொடர்பில் சில நாட்களுக்கு முன்னர் தான் Shamsul, அன்வாரின் அரசியல் செயலாளர் பொறுப்பிலிருந்து விலகினார்.
