குவா மூசாங், அக் 2-
கிளந்தான், குவா முசாங்கில் வெட்டு மர மேற்பார்வையாளர் யானைகளால் மிதிக்கப்பட்டு இறந்தார்.பெல்டா அரிங் 8 இல் உள்ள மரம் வெட்டும் பகுதியில் இரண்டு யானைகள் மேற்கொண்ட தாக்குதல்கள் பல மணி நேரம் நிகழ்ந்ததாகவும், இதன் விளைவாக 43 வயதுடைய Saidi Jahari என்ற அந்த மேற்பார்வையாளர் இறந்ததாக குவா முசாங் போலீஸ் தலைவர் சிக் சூன் பூ (Sik Choon Foo ) கூறினார்.
பாதிக்கப்பட்டவர் உட்பட ஆறு தொழிலாளர்கள் இரவு 10 மணியளவில் கூடாரங்களில் தூங்கிக் கொண்டிருந்தபோது, யானைகளின் உரத்த சத்தத்தினால் அவர்கள் விழித்தெழுந்ததாகவும், யானைகள் கூட்டம் நெருங்கி வருவதை Said jahari உணர்ந்ததாக கூறப்பட்டது.
தங்களை காப்பாற்றிக் கொள்ள அனைத்து தொழிலாளர்களும் காட்டுக்குள் ஓடியபோது உள்ளூர்வாசியான Saidi Jahari தப்ப முடியாமல் யானைகளிடம் சிக்கிக் கொண்டார்.
சில மணி நேரம் கழித்து தொழிலாளர்கள் திரும்பி வந்தபோது பாதிக்கப்பட்டவர் உயிருடன் இருப்பதையும், அவரது இரண்டு கால்களும் உடைந்த நிலையில் இருப்பதையும் கண்டதைத் தொடர்ந்து பாதிக்கப்பட்டவரை தற்காலிக தங்குமிடத்திற்காக கூடாரத்திற்குள் கொண்டு வந்தனர்.
இருப்பினும், மீண்டும் ஒரு யானை அவர்களைத் தாக்கத் திரும்பியது.”
தொழிலாளர்கள் பாதிக்கப்பட்டவரை விட்டுவிட்டு மீண்டும் காட்டுக்குள் தப்பிச் சென்றனர்.
நிலைமை அமைதியான பிறகு, கூடாரத்தில் இருந்து Saidi காணாமல் போனதைக் கண்டறிந்த பின்னர் அவரை இதர தொழிலாளர்கள் தேடத் தொடங்கினர்.
யானை மிதித்ததால் உடல் முழுவதிலும் பலத்த காயத்திற்கு உள்ளான Saidi Jahari அங்குள்ள சாலையில் இறந்து கிடந்தார்.
