சிரம்பான், நவம்பர் 30-“ஆயிரம் குறை சொன்னாலும், இந்நாட்டில் இந்தியச் சமுதாயத்திற்காக போராடும் ஒரே கட்சி ம.இ.கா தான்” என அதன் தேசியத் தலைவர் தான் ஸ்ரீ விக்னேஸ்வரன் கூறியுள்ளார்.
அதை யாரும் மறுக்கவோ மறைக்கவோ முடியாது என அவர் சொன்னார்.
பதவியில் இருந்தாலும் இல்லாவிட்டாலும் ம.இ.காவின் சேவைகள் எப்போதும் போலவே தொடருகின்றன; மக்களுக்கு ஒரு பிரச்னை என்றால் முதலில் வந்து நிற்பதும் ம.இ.காவினர் தான்…
மார்தட்டிக் கொள்ளும் மாற்றுக் கட்சிகளிடம் இதை எதிர்பார்க்க முடியாது என்றார் அவர்.
ம.இ.காவின் AIMST பல்கலைக்கழகம் மற்றும் TAFE கல்லூரி மூலம் ஆயிரக்கணக்கான பட்டதாரிகள் உருவாகியிருப்பதோடு, மாணவர்களுக்கு உதவ RM1.5 மில்லியன் நிதி ஒதுக்கப்பட்டுள்ளது.
தவிர, ம.இ.கா தலைமையகத்திற்கு அருகில் 4 ஏக்கர் நிலம் வாங்கி, பல மாடிக்கட்டிடத்தை அமைக்கவும் திட்டமிடப்பட்டுள்ளது.
பதவிக்காக யாரிடமும் கெஞ்சாத, பொதுநல அரசியலை முன்னெடுக்கும் தன்மானமுள்ள கட்சியாக ம.இ.கா தொடர்ந்து செயல்படுவதாக, சிரம்பானில் நடைபெற்ற ம.இ.கா மகளிர் ஒன்றுகூடல் நிகழ்வில், விக்னேஸ்வரன் தெரிவித்தார்.
ம.இ.கா மூத்தோர் மகளிர் இயக்கத்தின் தலைவர் லீலா சிவராஜ், கோத்தா ராஜா – ஸ்ரீ அண்டாலாஸ் முன்னாள் சட்டமன்ற உறுப்பினரும் சிலாங்கூர் மாநில முன்னாள் ஆட்சிக் குழு உறுப்பினருமான கமலா கணபதி இருவரும் இதில் உரையாற்றினர்.
தேசியத் உதவித் தலைவர்களான டத்தோ எம். அசோஜன், டத்தோ டி. முருகையா, டத்தோ Dr ஆர். நெல்சன், பொதுச் செயலாளர் டத்தோ எஸ். ஆனந்தன் உள்ளிட்ட தலைவர்களும் இதில் கலந்துகொண்டனர்.
