பூச்சோங், நவம்பர்-28 – சபா சுரங்க ஊழலில் சிக்கிய சர்ச்சைக்குரிய தொழிலதிபர் Albert Tei இன்று காலை மலேசிய ஊழல் தடுப்பு ஆணையமான MACC-யால் கைதுச் செய்யப்பட்டார்.
அவரது வழக்கறிஞர்களில் ஒருவர் அதனை உறுதிப்படுத்தினார்.
MACC அதிகாரிகள் சிலாங்கூர், பூச்சோங்கில் உள்ள அவரின் வீட்டுக்குள் வலுக்கட்டாயமாக நுழைந்து அவரைக் கைதுச் செய்து கைவிலங்குகளுடன் வெளியே கொண்டு வந்ததாக வழக்கறிஞர் Zaid Malek கூறினார்.
சில நிமிடங்களுக்குப் பிறகு அவர் மீண்டும் வீட்டுக்கு அழைத்து வரப்பட்டார்.
இருப்பினும், ஊழல் தடுப்புப் பிரிவினர் அத்தொழிலதிபரின் வீட்டைச் சோதனை செய்யும் ஆணையோடு தான் வந்திருந்ததாக, அவரின் மற்றொரு வழக்கறிஞர் Mahajoth Singh கூறியதாக மலேசியா கினி மேற்கோள் காட்டியது.
MACC மற்றும் போலீஸ் என இரு தரப்புமே வீட்டில் இருந்ததாகவும், தனது கட்சிக்காரரைச் சந்திக்க வேண்டும் என்ற தனது கோரிக்கை நிராகரிக்கப்பட்டதாகவும் Zaid Malek அறிக்கையொன்றில் கூறினார்.
இது அரசியலமைப்பு ரீதியான வழக்கறிஞர் உரிமையை மீறுவதாகக் குறிப்பிட்ட Malek, கைவிலங்கிட்டு ஆயுதமேந்திய அதிகாரிகளால் புடை சூழ ஒரு பயங்கரவாதியைக் கைது செய்வது போல் அவரை கொண்டுச் சென்றதாக சொன்னார்.
பிரதமர் டத்தோ ஸ்ரீ அன்வார் இப்ராஹிமின் முன்னாள் மூத்த அரசியல் செயலாளர் Datuk Seri Shamsul Iskandar Akin சம்பந்தப்பட்ட விசாரணையில் உதவுவதற்காக, Sofia Rini Buyong என்ற பெண்ணும் Albert Tei-யும் திங்கட்கிழமை வாக்குமூலங்களை வழங்க அழைக்கப்பட்டனர்.
லஞ்சம் கொடுத்ததன் பேரில் Albert Tei தற்போது 2 நீதிமன்ற குற்றச்சாட்டுகளை எதிர்நோக்கியுள்ளதும் குறிப்பிடத்தக்கது.
