லஹாட் டத்தோ, சபா, நவம்பர் 25 – சபா லஹாட் டத்தோ தாவாவ் சாலையின் 33 வது பகுதியில் நேற்று மதியம், MPV வாகனமும் டிரெய்லர் லாரியும் ஒன்றையொன்று மோதி விபத்துக்குள்ளானதில் மூவர் பரிதாபமாக உயிரிழந்தனர்.
அவ்விபத்தில் எட்டு வயது சிறுவன் கடுமையான காயங்களுக்கு ஆளாகி மருத்துவமனையில் அனுமதிக்கப்பட்டுள்ளான்.
லஹாட் டத்தோவிலிருந்து தாவாவ் நோக்கிச் சென்று கொண்டிருந்த டொயோட்டா இனோவா வாகனம், முன் சென்ற பல வாகனங்களை முந்த முயன்ற போது தன் வழித்தடத்திற்கு திரும்ப முடியாமல் எதிர்திசையில் வந்த டிரெய்லருடன் மோதி விபத்துக்குள்ளானது என்று லஹாட் டத்தோ மாவட்ட போலீஸ் தலைவர் ஸுல்பாஹாரின் இஸ்மாயில் (Dzulbaharin Ismail) கூறியுள்ளார்.
இந்த விபத்தில், 40 வயதான MPV ஓட்டுநரும், 39 மற்றும் 43 வயதான இரண்டு பயணிகளும் சம்பவ இடத்திலேயே உயிரிழந்தனர்.
அதே நேரத்தில் 56 வயது மதிக்கத்தக்க டிரெய்லர் ஓட்டுநர், சொற்ப காயங்களுடன் உயிர் தப்பியுள்ளார்.
இந்த வழக்கு சாலைப்போக்குவரத்து சட்டத்தின் அடிப்படையில் விசாரிக்கப்பட்டு வருகின்றது.
