புத்ராஜெயா, நவம்பர்-26 – பிரதமரின் அரசியல் செயலாளர் பொறுப்பிலிருந்து டத்தோ ஸ்ரீ Shamsul Iskandar Akin ராஜினாமா செய்துள்ளார்.
சர்சையான ஒரு விவகாரத்தை வைத்து தன் மீது தாக்குதல் நடத்த முயற்சிகள் நடப்பதாகவும், இது கடைசியில் அரசாங்கத்தின் நற்பெயரை பாதிக்கலாம் என்பதாலும், தாம் அம்முடிவுக்கு வந்ததாக X தளப் பதிவில் அவர் குறிப்பிட்டார்.
நேற்று காலையே டத்தோ ஸ்ரீ அன்வார் இப்ராஹிமிடம் பதவி விலகல் கடிதத்தை ஒப்படைத்து விட்டதையும் Shamsul உறுதிப்படுத்தினார்.
தன் மீது நம்பிக்கை வைத்து இதுநாள் வரை அரசியல் செயலாளர் என்ற முக்கியப் பொறுப்பை கொடுத்த அன்வாருக்கு அவர் நன்றியும் தெரிவித்துக் கொண்டார்.
பதவி விலகலுக்கான காரணம் குறித்து அவர் ஆழமாக எதனையும் விவரிக்காவிட்டாலும், அது அரசாங்க மருத்துவமனை குத்தகைத் திட்டம் தொடர்பில் அவர் வெளியிட்டதாகக் கூறப்படும் ஆதரவு கடிதம் தொடர்பானதே என்பதை புரிந்துகொள்ள முடிகிறது.
நெறிமுறைகளை மீறி ஆதரவு கடிதம் வெளியிட்டதற்காக Shamsul நீக்கப்பட வேண்டுமென எதிர்கட்சிகளோடு, பி.கே.ஆர். முன்னாள் துணைத் தலைவரான டத்தோ ஸ்ரீ ரஃபிசி ரம்லியும் முன்னதாக வலியுறுத்தினர்.
எனினும், Shamsul-லை கண்டித்து விட்டதாகவும், சட்ட மீறல்கள் எதுவும் நடக்காததால் அவரை நீக்க வேண்டிய அவசியம் இல்லை என்றும் பிரதமர் விளக்கியிருந்தார்.
இதனிடையே, தனது கனிமவள சுரங்க உரிமத்தை இரத்துச் செய்ததற்காக இதற்கு முன் சபா அரசாகங்கத்தை சாடிய பிரபல தொழில் அதிபர் Albert Tei, அவ்விவகாரத்தில் Shamsul-லின் பெயரையும் இழுத்திருப்பதும் புதிய சர்ச்சையைக் கிளப்பியுள்ளது.
சபா அரசியல்வாதிகள் சிலருக்கு லஞ்சமாக கொடுக்கப்பட்ட பணம் ‘வீணாகாமல் திரும்பக் கிடைக்கும்’ என உறுதியளிக்கப்பட்டதால், Shamsul-லுக்கு
RM629,000 பணத்தை கொடுத்ததாக Tei கூறியுள்ளது அதிர்ச்சியை ஏற்படுத்தியிருக்கிறது. அவர் அதற்கான WhatsApp குறுந்தகவல் ஆதாரம் கொடுத்துள்ளதாகவும் மலேசியாகினி செய்தி வெளியிட்டுள்ளது.
இது குறித்து Shamsul இதுவரை கருத்துரைக்கவில்லை.
