கோலாலம்பூர், அக்-27-மலேசியாவின் பெருமைக்குரிய அடையாளமான பெட்ரோனாஸ் இரட்டை கோபுரங்களை நினைவூட்டும் வகையில், இந்தியாவில் உருவாக்கப்பட்டுள்ள பிரம்மாண்ட மாதிரி ஒன்று இணையவாசிகளின் கவனத்தை ஈர்த்துள்ளது. அசல் KLCC கோபுரங்களைப் போலவே தோற்றமளிக்கும் இந்த மாதிரி, இரவில் ஒளிரும் விளக்குகளுடன் பார்ப்பவர்களை வியப்பில் ஆழ்த்துகிறது.
இந்தியாவின் கல்யாணி நகரில், துர்கா பூஜையை முன்னிட்டு இந்த மாதிரி அமைக்கப்பட்டுள்ளது. துர்கா தேவியைப் போற்றும் வகையில் ஆண்டுதோறும் கொண்டாடப்படும் இவ்விழாவில், தெய்வச் சிலைகள் வைக்கப்படும் சிறப்புப் பந்தல்கள் பல்வேறு கலைநயமிக்க வடிவங்களில் அலங்கரிக்கப்படுவது வழக்கம்.
சுமார் 148 அடி (45 மீட்டர்) உயரத்தில் உருவாக்கப்பட்டுள்ள இந்தக் கோபுர மாதிரி, கண்ணாடி, மரம் மற்றும் பிளைவுட் உள்ளிட்ட பொருட்களைக் கொண்டு கட்டமைக்கப்பட்டுள்ளது. அதன் வடிவமைப்பு, மலேசியாவின் புகழ்பெற்ற இரட்டைக் கோபுரங்களை நினைவுபடுத்தும் வகையில் அமைந்திருப்பது சுவாரஸ்யத்தை ஏற்படுத்தியிருக்கிறது.
இந்த மாதிரியின் மையப்பகுதியில் துர்கா தேவியின் சிலை வைக்கப்பட்டுள்ளது. கோபுர அமைப்பிலும் சிலையின் அலங்காரத்திலும் கண்ணாடிகள் பயன்படுத்தப்பட்டுள்ளன. மேலும், இரவு நேரத்தில் KLCC கோபுரங்களைப் போலவே ஒளிரும் தோற்றத்தை ஏற்படுத்துவதற்காக வெளிப்புறத்தில் விளக்குகளும் பொருத்தப்பட்டுள்ளன.
இந்தப் பிரம்மாண்ட மாதிரியை உருவாக்க சுமார் 70 பணியாளர்கள் இணைந்து பணியாற்றியுள்ளனர். மலேசியாவின் புகழ்பெற்ற கட்டிடக்கலை இந்தியாவில் விழா அலங்காரமாக உருவெடுத்திருப்பது பலரது ஆர்வத்தைத் தூண்டியுள்ளது. அசல் கட்டிடம் அல்ல என்றாலும், அதன் தோற்றத்தை நினைவூட்டும் இந்தப் படைப்பு பார்வையாளர்களை வெகுவாகக் கவர்ந்து வருகிறது.
