கோலாலம்பூர், ஏப்ரல் 8 – பெண்கள் அணியும் high heels காலணியொன்றின் சின்னம் Allah என்ற சொல்லை ஒத்திருப்பதாகக் கூறி புதிய சர்ச்சை எழுந்துள்ளது.
கடந்த இரண்டு நாட்களாக சமூக ஊடகங்களில் அது வைரலாகியுள்ள நிலையில், சம்பந்தப்பட்டத் தரப்புகளை மலேசிய இஸ்லாமிய மேம்பாட்டுத் துறை JAKIM இன்று அழைத்து விளக்கம் பெறவிருக்கிறது.
அது, இஸ்லாத்தை அவமதிக்கும் செயல் என கண்டறியப்பட்டால், எவருடனும் சமரசம் செய்துக் கொள்ளப்படாது என, இஸ்லாமிய விவகாரங்களுக்கான பிரதமர் துறை அமைச்சர் Datuk Dr Mohd Na’im Mokhtar திட்டவட்டமாகக் கூறினார்.
எனினும், அதுவரை அனைத்துத் தரப்பினரும் அவ்விஷயத்தில் அமைதிக் காக்க வேண்டும்; JAKIM-மும் அதிகாரத் தரப்பும் அது குறித்து விசாரிக்க நாம் வழி விட வேண்டும் என்றார் அவர்.
இவ்வேளையில், அக்காலணியைத் தயாரித்த நிறுவனமான Verns, சர்ச்சையை ஏற்படுத்தியுள்ள சின்னம் தொடர்பில் பகிரங்க மன்னிப்புக் கேட்டுக் கொண்டுள்ளது.
அச்சின்னம் முழுக்க முழுக்க கையிறு, high heels காலணியுடன் இணைவதன் outline வடிவமைப்பே ஆகும் என புகைப்படத்தை வெளியிட்டு Verns விளக்கமும் கொடுத்துள்ளது.
என்றாலும், பார்ப்போரின் கண்களுக்கு வேறு விதமாகத் தெரியும் அளவுக்கு, அச்சின்ன வடிவமைப்பில் குறைகள் இருப்பதை ஒப்புக் கொள்கிறோம்.
ஆனால், எந்தவொரு மதத்தையோ மத நம்பிக்கையையோ சிறுமைப்படுத்தும் நோக்கில் அச்சின்னம் உருவாக்கப்படவில்லை என்பதை உறுதிப்பட தெரிவித்துக் கொள்வதாக அறிக்கையொன்றில் அது கூறியது.
உடனடி நடவடிக்கையாக, அக்காலணிகளை விற்பனையில் இருந்து மீட்டுக் கொண்டு விட்டதாகவும், ஏற்கனவே வாங்கியவர்களுக்கு பணத்தைத் திருப்பித் தர தயார் என்றும் Verns தெரிவித்தது.
சர்சைக்குரியக் காலுறை விற்பனை விவகாரமே இன்னும் சூடு தணியாத நிலையில், இப்புதிய விவகாரம் வெடித்துள்ளது மக்களிடையே குறிப்பாக நெட்டிசன்கள் மத்தியில் கவலையை ஏற்படுத்தியுள்ளது.
